بکوژی ئەکبەری حاجی رۆستەم دەستگیرکرا

PUKMEDIA

لۆگۆی دەزگای ئاسایش

دەزگای ئاسایشی هەرێم بەهەماهەنگی دەزگای ئاسایشی نیشتمانی عیراق تۆمەتباری کوشتنی ( ئەکبەری حاجی رۆستەم )ی لەشاری بەغدا دەستگیرکرد.

لە راگەیەنراوێکدا کە وێنەیەکی بۆ PUKMEDIA نێردراوە، بەڕێوەبەرایەتی گشتی ئاسایش - سلێمانی رایگەیاند: 22ی ئەیلولی2025 لەگوندی ئۆمەربلی قەزای کفری هاووڵاتی ( ئەکبەری حاجی ڕۆستەم ) دەکوژرێت، دوای رووداوەکە دەستبەجێ بەڕێوەبەرایەتی گشتی ئۆپراسیۆنەکانی ئاسایش بەهەماهەنگی بەڕێوەبەرایەتی ئاسایشی گەرمیان و بەڕێوەبەرایەتی پۆلیسی گەرمیان  لێکۆڵینەوە و بەدواداچوونی وردیان دەستپێکرد و دوای لێکۆڵینەوەکان دەرکەوت بکوژ چووەتە باخی قوربانییەکە و چاوەڕوانی کردووە و دوای گەیشتنی (ئەکبەری حاجی ڕۆستەم)بەفیشەکێکی چەکی جۆری دەمانچە دەیکوژێت و دواتر بکوژ ئۆتۆمبێل و موبایلی کوژراو دەبات و لە شوێنی تاوان هەڵدێت و لە رێگەی ناحیەی سلێمان بەگ دەچێتە بەغدا و لەناوچەی دۆرە لەماڵێک خۆی حەشار دەدات، دواتر توانرا لە 23ى9ى2025 لەلایەن دەزگای ئاسایشی نیشتمانی عیراق و بەهەماهەنگی و زانيارى دەزگای ئاسایشی هەرێم دەستگیر بکرێت.

لە راگەیەنراوەکەدا ئەوەش هاتووە: تۆمەتبار بە رەگەز عەرەبە و تەمەنی (22)ساڵە ناوی (عەبدول عزیز جاسم محمود) دوای رادەستکردنی و ئەنجامدانی لێکۆڵینەوەکان لەدەزگای ئاسایشی هەرێم دانی بەتاوانەکەیدا ناوە.

ئەوەشخراوەتەڕوو: لەئێستادا تۆمەتبار بەبڕیاری دادوەری لێکۆڵینەوەی ئاسایش، بەماددەی (406 )لەیاسای سزادان راگیڕاوە و لێکۆڵینەوە لەدۆسیەکە بەردەوامە.

ئەمەش لەدوای ئەوەدێت لە ئێوارەی رۆژی دووشەممە 22ی ئەیلولی 2025 تەرمی ئەکبەری حاجی رۆستەم بە کوژراوی لە باخەکەی خۆی لە گوندی ئۆمەبربلی سنووری قەزای کفری دۆزرایەوە.

PUKMEDIA