راگرتنی هەناردەی نەوتی هەرێم ساڵانە چوار ملیار دۆلار زیان بە عیراق دەگەیەنێت

AP

كاركردن لە كێڵگەیەكی نەوت

روانگەی ئابووریی عیراق رایگەیاند: داهاتی خەمڵێندراوی هەناردەكردنی نەوتی هەرێمی كوردستان رۆژانە 11 ملیۆن و 160 هەزار دۆلارە و بە هەناردەنەكردنی، ساڵانە زیاتر لە چوار ملیار دۆلار زیان بەر ئابووریی عیراق دەكەوێت.

روانگەی ئابووریی عیراق ئاشکرایکردووە،  تێچووی دەرهێنان و گواستنەوە بۆ هەر بەرمیلێك نەوت نزیكەی 16 دۆلارە و تێچووی گەیاندنی نەوتیش بۆ بەندەری جەیهان بۆ هەر بەرمیلێك، دۆلار و نیوێكە. 

روونیشیكردووەتەوە، پێشبینی دەكرێت لە دوای لێبڕینی تێچووەكان، قازانجی پاكی هەناردەكردنی 230 هەزار بەرمیل لە رۆژێكدا، بە نرخی 66 دۆلار بۆ هەر بەرمیلێك، نزیكەی 11 ملیۆن و 160هەزار دۆلار بێت، كە بەوەش عیراق مانگانە 334 ملیۆن دۆلار و ساڵانە زیاتر لە چوار ملیار دۆلار زیانی پێ دەگات، لە ئەنجامی راگرتنی هەناردەكردنی نەوتی هەرێمی كوردستان.

PUKMEDIA