سوپای پۆڵەندا داخستنی چوار فڕۆکەخانەی راگەیاند

Polish presidency of the Council of the European Union

ئاڵاى پۆڵەندا

سوپای پۆڵەندا داخستنی چوار فڕۆکەخانەی راگەیاند، بۆ دیاریکردنی شوێنی کەوتنەخوارەوەی فڕۆکە بێفڕۆکەوانەکان کە هێرشیان کردە سەر پۆڵەندا لێکۆڵینەوەکان هێشتا بەردەوامن.

ئەمڕۆ چوارشەممە 10ى9ى2025 سوپاى پۆڵەندا رایگەیاند، بۆ دیاریکردنی شوێنی کەوتنەخوارەوەی فڕۆکە بێفڕۆکەوانەکان کە هێرشیان کردە سەر پۆڵەندا چوار فڕۆکەخانە دادەخەین.

سوپاى پۆڵەندا لە بەیاننامەیەکدا ئاماژەی بەوەکردووە، ئەو هێرشە پێشێلکارییەکی بێوێنەی ئاسمانی ئێمە بووە لەلایەن ژمارەیەک فڕۆکەی بێفڕۆکەوانەوە.

لای خۆیەوە بەرپرسی سیاسەتی دەرەوەی یەکێتی ئەوروپا رایگەیاند، ئەوەی لە پۆڵەندا بینییمان، جددیترین پێشێلکاری رووسیا بوو بۆ ئاسمانی ئێمە لە سەرەتای جەنگەوە.

فەرماندەیی ئۆپەراسیۆنی پۆڵەندا لە پۆستێکدا لە سۆشیاڵ میدیای X  رایگەیاند، ئەمە کردەوەیەکی شەڕانگێزییە کە مەترسییەکی راستەقینەی لەسەر سەلامەتی هاووڵاتییانمان دروستکردووە.

ڤۆلۆدیمیر زێلێنسکی سەرۆکی ئۆکرانیا رایگەیاند، لانیکەم هەشت فڕۆکەی بێفڕۆکەوان بەرەو پۆڵەندا ئاراستەکراون، ئەمەش بە پێشبینییەکی زۆر مەترسیدار بۆ ئەوروپا ناوی بردووە.

هێزەکانی پۆڵەندا ئەمڕۆ چوارشەممە چەندان فڕۆکەی بێفڕۆکەوانیان خستە خوارەوە کە ئاسمانی وڵاتەکەیانى پێشێل کرد، لە کاتی هێرشی ئاسمانی رووسیا بۆ سەر ئۆکرانیا.

PUKMEDIA