لە کەرکوک رێکاری یاسایی بەرامبەر بە ئەندامانی بایکۆت دەگیرێتە بەر

میدیاکان

ئیبراهیم حافز سەرۆکی ئەنجومەنی پارێزگای کەرکوک

سەرۆکی ئەنجومەنی پارێزگای کەرکوک رایدەگەیەنێت دەقێکی یاسایی نیە ماف بە ئەندامانی ئەنجومەن بدات بایکۆتی دانیشتنەکان بکەن، دووپاتیشی دەکاتەوە؛ ئەو ئەندامانەی ئامادە نابن رێکاری یاساییان لەدژ دەگیرێتە بەر.

ئیبراهیم حافز سەرۆکی ئەنجومەنی پارێزگای کەرکوک، لە کۆنگرەیەکی رۆژنامەوانیدا رایگەیاند: هیچ دەقێکی یاسایی نیە کە ماف بە ئەندامانی ئەنجومەن بدات، بایکۆتی دانیشتنەکان بکەن.

سەرۆکی ئەنجومەنەکە داوای کرد ئەندامانی ئەنجومەن بەشداری لە دانیشتنەکانی کەرکوکدا بکەن، چونکە شتێک نییە بە ناوی بایکۆتەوە، ئەوان فەرمانبەری دەوڵەتن و  مووچە وەردەگرن بەبێ ئەوەی کار بکەن.

 ئیبراهیم حافز روونیشی کردەوە: ئەنجومەن بەهۆی ئامادەنەبوونی ئەندامەکانییەوە کارەکانی وەستاوە و بەهۆی تەواو نەکردنی رێژەی یاساییەوە ناتوانێت کۆببێتەوە، بۆیە لە هەفتەی داهاتووەوە رێکاری یاسایی لە دژی ئەو ئەندامانە دەگرینە بەر کە ئامادەی دانیشتنەکان نابن.

 ئەنجومەنی پارێزگای کەرکوک لە 16 کورسی پێکدێت و یەکێتی 5 کورسی بەرکەوتووە، هەروەها پارتی دیموکراتی کوردستان 2 کورسی و 6 کورسییەکەی دیکە بۆ فراکسیۆنە عەرەبی و پێکهاتەی تورکمان و کورسییەکیش بۆ مەسیحییەکانە.

PUKMEDIA