په‌رله‌مانتارێك: له‌ماوه‌یه‌كی نزیكدا به‌غدا مووچه‌ی مانگی شه‌ش بۆ هه‌رێم ده‌نێرێت

PUKMEDIA

دراوی عیراقی

ئه‌ندامێكی ئه‌نجومه‌نی نوێنه‌رانی عیراق له‌فراكسیۆنی یه‌كێتی زانیاری له‌باره‌ی مووچه‌ی مانگی شه‌شی مووچه‌ خۆرانی هه‌رێم ئاشكرا ده‌كات و ده‌ڵێت:" ئه‌گه‌ر هیچ كێشه‌یه‌ك دروست نه‌بێت حكومه‌تی عیراق له‌ماوه‌یه‌كی نزیكدا مووچه‌ی مانگی حوزه‌یران بۆ هه‌رێم ده‌نێرێت".

سروه‌ محه‌مه‌د ئه‌ندامی ئه‌نجومه‌نی نوێنه‌رانی عیراق له‌فراكسیۆنی یه‌كێتیی نیشتمانیی كوردستان به‌ PUKMEDIA ی رایگه‌یاند:" له‌ئێستادا وه‌زاره‌تی دارایی عیراق سه‌رقاڵی وردبینیكردنه‌ له‌لیستی مووچه‌ی مانگی شه‌شی مووچه‌ خۆرانی هه‌رێمی كوردستان".

 ئاماژه‌ی به‌وه‌شدا:" ئه‌گه‌ر هیچ گرفتێكی ته‌كنیكی و سیاسی نه‌یه‌ته‌ پێشه‌وه‌ و هه‌رێم و به‌غدا پابه‌ندی لێكتێگه‌یشتنی نێوانیان بن، له‌ماوه‌یه‌كی نزیكدا به‌غدا مووچه‌ی مانگی حوزه‌یران ره‌وانه‌ی هه‌رێمی كوردستان ده‌كات".

لای خۆشیه‌وه‌ سه‌رچاوه‌یه‌ك له‌ وه‌زاره‌تی دارایی و ئابووریی هه‌رێمی كوردستان ئاشكرایكردووه‌:" له‌م هه‌فته‌یه‌دا داهاتی ناوخۆی هه‌رێم بۆ به‌غدا ده‌نێرین و پێشتریش لیستی مووچه‌ و ته‌رازووی  پێداچوونه‌وه‌ نێردراوه‌ بۆ وه‌زاره‌تی دارایی عیراق".

حكومه‌تی هه‌رێمی كوردستان بۆ ناردنی مووچه‌ی مانگی ئایار، بڕی 120 ملیار دیناری بۆ عیراق وه‌ك داهاتی نانه‌وتی نارد، بۆ ناردنی مووچه‌ی مانگی حوزه‌یرانیش حكومه‌تی هه‌رێمی كوردستان پێویسته‌ جارێكی دیكه‌ بڕی 120 ملیار دینار بۆ به‌غدا بنێرێت، ئه‌مه‌ جگه‌ له‌ئه‌وه‌ی كه‌ هه‌رێمی كوردستان ده‌بێت پایه‌ندبێت به‌هه‌نارده‌كردنی نه‌وتی هه‌رێم له‌رێی كۆمپانیای سۆمۆوه‌ به‌پێی ئه‌و لێكتێگه‌یشتنه‌ی له‌نێوان هه‌ردوو حكومه‌تدا هه‌یه‌.

PUKMEDIA