ئیسرائیل وه‌زاره‌تی به‌رگریی و كۆشكی سه‌رۆكایه‌تی سووریا بۆردومان ده‌كات

رۆیتەرز

هێرشەكانی ئیسرائیل بۆ سەر كۆشكی سه‌رۆكایه‌تی و پێگه‌ی وه‌زاره‌تی به‌رگریی سوریا

دوانیوه‌ڕۆی ئه‌مڕۆ چوارشه‌ممه‌، ئیسرائیل هه‌ریه‌ك له‌كۆشكی سه‌رۆكایه‌تی له‌ دیمه‌شق و پێگه‌ی وه‌زاره‌تی به‌رگریی سوریای كرده‌ ئامانج و به‌پێی زانیارییه‌ سه‌ره‌تاییه‌كان به‌هۆی هێرشه‌كه‌وه‌ كوژراو و بریندار هه‌یه‌.

ئه‌مڕۆ 16ی7ی2025 ئیسرائیل جارێكی دیكه‌ كۆشكی سه‌رۆكایه‌تی و كۆمه‌ڵگه‌ی ئه‌ركانی گشتیی سه‌ر به‌ وه‌زاره‌تی به‌رگریی سووریای له‌ دیمه‌شق بۆردوومان كرده‌وه‌ و زیانی گیانی لێكه‌وته‌وه‌.

بنیامین ناتانیاهۆ، سه‌رۆكوه‌زیرانی ئیسرائیل رایگه‌یاندووه‌: "بارودۆخی باشووری رۆژئاوای سووریا مه‌ترسیداره‌ و ده‌بێت چاره‌سه‌ر بكرێت"، هاوكات یسرائیل كاتز، وه‌زیری به‌رگریی ئیسرائیل ده‌ڵێت: "هێرشه‌ توونده‌كانمان بۆسه‌ر سووریا ده‌ستیپێكردوه‌ته‌وه‌ و كۆشكی سه‌رۆكایه‌تی سووریا و كۆمه‌ڵگه‌ی ئه‌ركانی گشتی سه‌ر به‌ وه‌زاره‌تی به‌رگریی سووریامان له‌ دیمه‌شق كردوه‌ته‌ ئامانج".

هاوكات ئاژانسی هه‌واڵی رۆیته‌رز بڵاویكردوه‌ته‌وه‌: "هێرشه‌كه‌ی ئیسرائیل بۆ سه‌ر وه‌زاره‌تی به‌رگریی سوریا بریندار و كوژراوی لێكه‌وتووه‌ته‌وه‌".