هەر چلۆنێ ئیشارەتت فەرموو

PUKMEDIA

ستران عەبدوڵڵا

هەمیشە پێش مێژوو دەکەوتی, پێش بەسەرهات و لێقەومانەکان هاوارت بۆ نەتەوە و لە نەتەوە دەکرد: وەرن با باشی بخوێنینەوە و باشی بقۆزینەوە.

بە یاری کورد و نەیاری کوردستانت دەگوت : ئاشتی رێی زێرین و چەک رێی دێرین کە لەبەر گوێنەگرتن پەنا و پایە بوو .

هەمیشە لەوانەی سیاسییدا دەتگوت : نە لەباری ببەین و نەمرداری بکەینەوە، پێش هەمووان بۆنی شەماڵی گۆڕانکارییەکان و گوێت لە باهۆزی رەشەباکان دەبوو، وەک (پیرۆت)ێکی لادێی کوردەواری دەتزانی کەی پەڵەدەدا و کامە فشە بارانی نێوان وەرزەکانە.

داخ و جەخار ئەگەر کورد و کرمانج زووتر بە قسەیان دەکردی و گوێیان لە ترپەی دڵت دەبوو نها کوردان ساحێبی چەند دایەرەو دەوڵەت و حەفت ئیقلیمی بژوێن دەبوون ، لە گشتیا هەم ئاشتی و ئاوەدانی ، هەم گوزەران و هەم کەرامەت، هەم سایە و هەم کایە هەبوو.

بۆ دەورانی خەباتی پێویستی چەک زۆنت پایتەخت و بۆ نەبەردی موفاوەزە و موزاکەرە دانوستکارێکی پایەدار بووی .

هەمیشە پێش مێژوو دەوکەتی ، تەقەویمی لات چەند ساڵ و چەند دەیە دواتری تیابوو . وەک ناو لەپی خڕ و سافت دوارۆژت لێ روون بوو.

دەڵێی حاجی قادری هاوشارت مەخسەدی تۆ بوو مام جەلال کە دەیوت:(هەر چلۆنێ ئیشارەتی فەرموو، وەک کەرامەت ،هەمووی وەها دەرچوو).

PUKMEDIA