لیژنەكە: مافی مووچەخۆرانی هەرێم پارێزراوبێت

راگەیاندنی وەزارەتی پلاندانانی عیراق

كۆبوونەوەی لیژنە وەزارییەكە

لیژنەی وەزاریی تایبەت بە چارەسەركردنی كێشەكانی نێوان حكومەتی هەرێم و حكومەتی فیدراڵ، كۆبووەوە و تاوتوێی هەردوو رەشنووسی حكومەتی هەرێم و حكومەتی فیدراڵیان كرد، هاوكات باسیان لە پرسی هەناردەكردنەوەی نەوت و داهات و تەوتین كرد و جەختیان لەسەر پاراستنی مافی مووچەخۆرانی هەرێم كردەوە.

لە راگەیەندراوێكی وەزارەتی پلاندانانی عیراق، كە كۆپییەكی دەست PUKMEDIA كەوتووە راگەیەندراوە: "ئەمڕۆ  9ی7ی2025 لیژنە وەزارییەكە یەكەم كۆبوونەوەی ئەنجامدا و تاوتوێی هەردوو رەشنووسی حكومەتی هەرێمی كوردستان و حكومەتی فیدراڵی كرد، هاوكات ئەندامانی لیژنەكە گفتوگۆی هەناردەكردنەوەی نەوتی هەرێم و میكانیزمەكانی رێكخستنەوەی پڕۆسەكەیان كرد".

ئەوەشخراوەتەڕوو: "هەر لە كۆبوونەوەكەدا گفتوگۆ لەبارەی قەبارەی بەكاربردنی بەرهەمە نەوتییەكانی هەرێم و رادەستكردنی پشكی خەزێنەی فیدراڵی لە داهاتە نانەوتییەكانی هەرێمی كوردستان كراوە، هاوكات ئەندامانی لیژنەكە گفتوگۆیان لەبارەی تەوتینی مووچەی مووچەخۆرانی هەرێم كردووە".

وەزارەتی پلاندانانی عیراق، لە راگەیەندراوەكەدا ئەوەشی خستووەتەڕوو: "ئەندامانی لیژنەكە جەختیان لە گرنگی بەردەوامی گفتوگۆ هونەریی و كارگێڕییەكان سەبارەت بەم دۆسیانە بە ئامانجی دۆزینەوەی چارەسەری خێرا و دادپەروەرانە و لۆژیكی كردەوە، كە مافی مووچەخۆرانی هەرێم هاوشێوەی مووچەخۆرانی عیراق لە چوارچێوەی یەكخستنی سیاسەتی دارایی دەوڵەتی عیراقدا پارێزراوبێت". 

ئەمەش لەكاتێكدایە، محەمەد شیاع سودانی سەرۆكوەزیرانی عیراق، دوێنێ سێ شەممە، لە كۆبوونەوەی ئەنجومەنەكەدا، بڕیاریدا لیژنەیەك لە پێنج وەزیر بۆ یەكلایی كردنەوەی پڕۆژە پێشنیازكراوەكەی حكومەتی عیراق و هەرێم لەبارەی چارەسەری مووچە و نەوت و داهات و تەوتین، بە سەرۆكایەتی جێگری سەرۆكوەزیران و وەزیری پلاندانان و بە ئەندامێتی وەزیرانی ئاوەدانكردنەوە، نیشتەجێكردن، خوێندنی باڵا، داد و تەندروستی پێكبهێنرێت، بۆ ئەوەی لەگەڵ لایەنی پەیوەندیداری هەرێم و عیراق لەسەر رەشنووسەكان گفتوگۆ بكەن.

PUKMEDIA