بارودۆخی قه‌زای خه‌بات ئاسایی ده‌بێته‌وه‌

تایبەت

ئاڵۆزییەکانی قەزای خەبات

دوای 12 سه‌عات شه‌ڕو پێكدادان له‌قه‌زای خه‌بات له‌نێوان عه‌شیره‌تی هه‌ركی و هێزه‌ ئه‌منییه‌كانی هه‌ولێر، له‌ئێستادا بارودۆخه‌كه‌ ئاسایی بووه‌ته‌وه‌و به‌پێی زانیارییه‌ ناڕه‌سمییه‌كانیش له‌و شه‌ڕ و ئاڵۆزییانه‌دا دوو كه‌س كوژراون و نزیكه‌ی 10 كه‌سیش برینداربوون.

هێزه‌ ئه‌منییه‌كان ده‌یانویست خورشید هه‌ركی سه‌رۆكی عه‌شیره‌تی هه‌ركی ده‌ستگیر بكه‌ن، به‌ڵام ناوبراو ئاماده‌نه‌بوو خۆی به‌ده‌سته‌وه‌ بدات و به‌رگری كرد، به‌وهۆیه‌شه‌وه‌ شه‌ڕ له‌نێوان عه‌شیره‌تی هه‌ركی و هێزه‌ ئه‌منییه‌كانی هه‌ولێر دروستبوو، كه‌ به‌پێی زانیارییه‌ ناڕه‌سمییه‌كان یه‌كێك له‌عه‌شیره‌تی هه‌ركی و كه‌سێكیش له‌هێزه‌ ئه‌میینه‌كان كوژراون، هاوكات 8 كه‌سی دیكه‌ش برینداربوون.

به‌پێی زانیارییه‌ میدیاییه‌كان، به‌ره‌به‌یانی ئه‌مڕۆ چوارشه‌ممه‌ وه‌فدێكی پارتی دیموكراتی كوردستان سه‌ردانی ماڵی خورشید هه‌ركی-یان كردووه‌و داوای ئاسایی كردنه‌وه‌ی بارودۆخه‌كه‌یان كردووه‌، له‌به‌رامبه‌ریشدا سه‌رۆكی عه‌شیره‌تی هه‌ركی داوای كردووه‌ ئه‌و هێزه‌ ئه‌منییانه‌ی چوارده‌وری ماڵه‌كه‌یان داوه‌ بكشێنه‌وه‌، هاوكات بڕیاردراوه‌ به‌شێك له‌هێزه‌كان بكشێنه‌وه‌، ئه‌مه‌ش بارودۆخه‌كه‌ی ئاسایی كردووه‌ته‌وه‌.

به‌هۆی ئه‌وشه‌ڕ و پێكدادانه‌وه‌ زیانی زۆری ماددی به‌ ماڵه‌كانی قه‌زای خه‌بات کەوتووە و چه‌ند ئۆتۆمبێلێكی سه‌ربازی و ئاسایی له‌هه‌ردوولا سووتان كه‌ زۆربه‌یان ئۆتۆمبێلی هێزه‌ ئه‌منییه‌كان بوون و له‌شه‌ڕه‌كه‌دا چه‌كی سووك و قورس به‌كارهێنرا.

PUKMEDIA