وەزیرى کشتوکاڵ: پڕۆژەی KORES بۆ گەشەپێدانی ناوچە گوندنشینەکان دەستیپێکرد

نوسینگەى راگەیاندنى وەزیرى کشتوکاڵ و سەرچاوەکانى ئاو

بێگەرد تاڵەبانی وەزیری کشتوکاڵ و سەرچاوەکانی ئاو

پڕۆژەی کۆریس بۆ پەرەپێدانی کەرتی زەیتون، لە هەرێم دەستیپێکرد و وەزیری کشتوکاڵ و سەرچاوەکانی ئاو، رایگەیاند: "پڕۆژەی (KORES) بۆ پەرەپێدانی بەردەوامی کەرتی زەیتون و زەیتی زەیتونە لە هەرێمی کوردستان".

ئەمڕۆ یەکشەممە 6ى7ى2025 بێگەرد تاڵەبانی وەزیری کشتوکاڵ و سەرچاوەکانی ئاو راگەیەنراوێکى بڵاوکردەوە و رایگەیاند : "پڕۆژەی (KORES) بۆ پەرەپێدانی بەردەوامی کەرتی زەیتون و زەیتی زەیتون لە هەرێمی کوردستان، بە پاڵپشتی پەیمانگەی نێودەوڵەتی "سیهام باری" ئیتاڵی دەستیپێکرد".

ئاماژەى بەوەشداوە: "تیمێکی پسپۆڕی ئیتاڵی گەیشتوونەتە هەرێمی کوردستان و لەگەڵ وەزارەتی کشتوکاڵ و بەشێک لە جوتیاران یەکەمین وۆرکشۆپی هاوبەشیان بۆ جێبەجێکردنی پڕۆژەکە ئەنجامداوە".

روونیشیکردەوە: "ئامانجی پڕۆژەکە، کە ماوەی ساڵێک دەخایەنێت، بریتییە لە پێشخستن و بەرزکردنەوەی توانای جوتیاران و بەکارهێنانی سیستەمی پێشکەوتوو، تا دەگاتە بەبڕاندکردن و بەبازاڕکردنی بەرهەمەکانى زەیتون".

ئەوەشى خستەڕوو: "چاوەڕوان دەکرێت ئەم پڕۆژەیە ببێتە هۆی خاڵێکى وەچەرخانی گرنگ لە بواری بەرهەمهێنانی زەیتون لە هەرێمی کوردستان".

بێگەرد تاڵەبانی وەزیری کشتوکاڵ و سەرچاوەکانی ئاو، راشیگەیاند: "ئەم پڕۆژەیە راستەوخۆ پاڵپشتی دارایی و تەکنیکی و راوێژکاری لە لایەن پەیمانگەی نێودەوڵەتی سیهام باری لە ولاتی ئیتالیاوە دەکرێت".

PUKMEDIA