سەرۆككۆمار: كار بۆ بەرەنگاربوونەوەی گۆڕانی كەشوهەوا و پیسبوونی ئاو بكرێت

نووسینگەی راگەیاندنی سەرۆكایەتی كۆمار

كۆبوونەوەی سەرۆككۆمار لەگەڵ پادشای ئوردن

ئەمڕۆ 8-6-2025، د.لەتیف جەمال رەشید، سەرۆككۆماری عیراق، لەگەڵ شاعەبدوڵڵای دووەم بن ئەلحوسێن، پادشای شانشینی هاشمی ئوردن، لە پەراوێزی سێیەمین كۆنفرانسی ئۆقیانوسی نەتەوە یەكگرتووەكان لە شاری نیسی فەرەنسا كۆبووەوە .

لەمیانی دیدارەكەدا كە جێگری سەرۆك وەزیران و فوئاد حوسێن وەزیری دەرەوە و ئەیمەن سەفەدی وەزیری دەرەوەی ئۆردن و ژمارەیەك لە لێپرسراوانی هەردو وڵات ئامادەی بوون، باسیان لەپتەوكردنی پەیوەندییەكانی نێوان هەردوو وڵاتی برا و چۆنییەتی پەرەپێدانیان لەهەموو بوارەكاندا كرد، هەروەها فراوانكردنی هاریكاری و ئاڵوگۆڕی بازرگانی بۆ خزمەتكردنی بەرژەوەندییە هاوبەشەكانی هەردو گەلی عیراق و ئوردن.

سەرۆككۆمار جەختی لە پێویستی كاری هاوبەش بۆ بەرەنگاربوونەوەی گۆڕانی كەشوهەوا و پاراستنی هەمەجۆری زیندوەران و كەمكردنەوەی پیسبوونی زەریاكان و سەرچاوەكانی ئاو و پشتگیریكردنی هەوڵەكان بۆ گەیشتن بە ئامانجەكانی گەشەپێدانی بەردەوام كردەوە، هەروەها پێداچوونەوە بەو پرسانە كرا كە لە سێیەمین كۆنفڕانسی ئۆقیانوسی نەتەوە یەكگرتووەكاندا باسیان لێدەكرێت .

هەر لە دیدارەكەدا تاوتوێی بارودۆخی ناوچەكە كرا و دووپاتیشیان لە گرنگی هەوڵە هاوبەشەكان بۆ چەسپاندنی ئاسایش و سەقامگیری و پشتیوانیكردنی گەلی فەلەستین لە گەیشتن بە مافەڕەواكانی بۆ دامەزراندنی دەوڵەتی سەربەخۆ كردەوە، هاوكات داوایان لە كۆمەڵگەی نێودەوڵەتی كرد بۆ دەستەبەركردنی گەیاندنی یارمەتییە مرۆییەكان بۆ كەرتی غەززە.

 لەبەرامبەردا پادشای ئوردن پابەندبوونی وڵاتەكەی بۆ پتەوكردنی پەیوەندییە دووقۆڵییەكان و فراوانكردنی هاوكارییەكانی نێوان هەردوو وڵات بۆ خزمەتكردنی بەرژەوەندییە هاوبەشەكان دووپاتكردەوە و ئاماژەی بە گرنگی كاركردن لەسەر دەرئەنجامەكانی ئەم دواییەی لوتكەی عەرەبی لەبەغدا و كۆتایی هێنان بە پەرەسەندنە مەترسیدارەكان لە كەرتی رۆژئاوا.

سەرۆك كۆماریش پیرۆزبایی لە شاعەبدوڵڵا كرد بەبۆنەی سەركەوتنی هەڵبژاردەی تۆپی پێی ئوردن بۆ مۆندیال.

PUKMEDIA