هەرێم لیستی مووچەی مانگی ئایار رەوانەی بەغدا دەكات

PUKMEDIA

مووچەی فەرمانبەرانی هەرێم

لیستی مووچەی مانگی ئایاری فەرمانبەران و مووچەخۆرانی هەرێمی كوردستان، رەوانەی وەزارەتی دارایی حكومەتی فیدراڵ كرا.

لە راگەیەندراوێكی وەزارەتی دارایی و ئابوری هەرێم كە كۆپییەكی دەست PUKMEDIA كەووتووە راگەیەندراوە: "ئەمڕۆ 25-5-2025، لیستی مووچەی مانگی ئایاری فەرمانبەران و مووچەخۆرانی هەرێمی كوردستان، لە لایەن تیمی تەكنیكی وەزارەتی دارایی و ئابووری هەرێمی كوردستانەوە رەوانەی فەرمانگەی ژمێریاری وەزارەتی دارایی حكومەتی فیدراڵ كرا".

رۆژی 22ی5ی2025، بەشی گەنجینەی فیدراڵی لە داهاتی نانەوتی هەرێمی كوردستان بۆ مانگی نیسانی ساڵی ( 2025 ) بڕی 50.522.750.000 پەنجا ملیارو پێنج سەدو بیست و دوو ملیۆن و حەوت سەدو پەنجا هەزار دیناری بەشێوەی كاش خستە سەر هەژماری بانكی وەزارەتی دارایی حكومەتی فیدراڵ لە لقی هەولێری بانكی ناوەندی.

ئەمەش لە كاتێكدایە رۆژی 14-5-2025، وەزارەتی دارایی حكومەتی هەرێم دەستی بە دابەشكردنی مووچەی مانگی نیسانی فەرمانبەران و مووچەخۆرانی هەرێم كرد و رۆژی 18-5-2025 یش كۆتایی بەدابەشكردنی مووچە هێنا.

PUKMEDIA