سەرۆککۆمار: ئامانجى لووتکەی عەرەبی یەکخستنی هەوڵەکان و کاری هاوبەشە

نوسینگەى راگەیاندنى سەرۆککۆمار

د.لەتیف جەمال رەشید سەرۆککۆمار

سەرۆککۆمار د.لەتیف جەمال رەشید ئێوارەی ئەمڕۆ 17 ی ئایاری 2025 کۆتایی کارەکانی 34هەمین لووتکەی ئاسایی عەرەبی راگەیاند، ئامانجەکەشى خستەڕوو: "ئامانج لە لووتکەی ئەمڕۆی کۆمکاری عەرەبی یەکخستنی هەوڵەکانمان و بەرەوپێشبردنی پرۆسەی کاری هاوبەشە بۆ دەستەبەرکردنی بەرژەوەندییە باڵاکانی گەلانی ناوچەکە".

سەرۆککۆمار بەناوی حکومەت و گەلی عیراقەوە و بەناوی خۆشیەوە سوپاس و پێزانینی خۆی ئاراستەی بەڕێزان و خاوەن شکۆ و پایەبەرزانی بەشداربوی لوتکەکە بۆ  بەشداریکردنیان  لەکارەکانی ئەم لووتکەیەدا کرد، هەروەها ستایشی ئەو هەوڵانەی کرد، کە ئەنجامدراون و بوونە هۆی بڕیار و راسپاردە بەنرخەکان کە خزمەت بە مەسەلەی عەرەبی و ناوچەیی دەکات و هەروەها لە بەهێزکردنی میکانیزمەکانی کاری هاوبەش بۆ رووبەڕووبوونەوەی ئاستەنگەکان، لە سەروو هەموویانەوە کێشەی فەلەستین و پەرەسەندنەکانی سوریا و لوبنان و لیبیا و یەمەن و سودان و سۆماڵ و چەند پرسێکی دیکە، کە کاریگەری لەسەر ئاسایش و سەقامگیری ناوچەکە هەیە.

سەرۆککۆمار ئاماژەی بەئەوەدا، کە ئامانج لە لووتکەی ئەمڕۆی کۆمکاری عەرەبی یەکخستنی هەوڵەکانمان و بەرەوپێشبردنی پرۆسەی کاری هاوبەشە بۆ دەستەبەرکردنی بەرژەوەندییە باڵاکانی گەلانی ناوچەکە.

ئەمڕۆ 17ی 5 ی 2025  سی و چوارەمین لوتکەی عەرەبی بە دروشمی (پایتەختی شارستانیەت پێشوازی لە براکانی دەکات)، بەئامادەبوونی سەرۆک و سەرکردە عەرەبییەکان و ئەمینداری گشتیی نەتەوە یەکگرتووەکان و کۆمکاری وڵاتانی عەرەبی و رێکخراوی هاوکاری ئیسلامی و ئەنجومەنی هاوکاری کەنداو، لەگەڵ دەیان میوانی وڵاتانی عەرەبی و یەکێتی ئەوروپا و رێکخراوە نێودەوڵەتییەکان لەعیراق بەڕێوەچوو.

PUKMEDIA