سبەی كۆنفرانسی یەكڕیزی و یەك هەڵوێستی كورد لە قامیشلۆ رێكدەخرێت

medyanews

قامیشلۆ

بڕیارە سبەی 26/4/2025 كۆنفرانسی یەكڕیزیی و یەكهەڵێستی كورد لە رۆژئاوای كوردستان لە قامیشلۆ بەڕێوەبچێت و  400 كەس لە باكوور، باشوور، رۆژهەڵات و رۆژئاوا بەشداری بكەن.

 لیژنەی ئامادەكاری كۆنفڕانسی رۆژاڤا، لە راگەیەندراوێكدا دەڵێت:" شەممە سەعات 10:00ی پێشنیوەڕۆ  كۆنفڕانسی كوردان لە رۆژاڤای كوردستان  سازدەكرێت كە ساڵانێكە كاری بۆ دەكرێت ".

 لە كۆنفرانسەكەدا  نوێنەری  سەرجەم پارتەكانی كوردستان، ڕێكخراوەكانی ژنان و گەنجان، كەسایەتییەكان، ڕۆشنبیران، هونەرمەندان و نوێنەرانی ئاینییەكانی رۆژاڤای كوردستان، كەسایەتییە كوردستانيیەكانی شارەكانی شام، حەلەب، حەما، باب و ئەعزاز،  بەشداری كۆنفڕانسەكە دەكەن.

هەر بەگوێرەی راگەیەندراوەكەی لیژنەكە نزیكەی 60 كەناڵ و دامەزراوەی میدیایی و 200 رۆژنامەنوس و میدیاكار چاودێری و روماڵ دەكەن.

هاوكات بەگوێرەی زانیارییەكانی PUKMEDIA، وەفدێكی یەكێتیی نیشتمانیی كوردستان بۆ بەشداریكردن لە كۆنفرانسی یەكڕیزیی و یەكهەڵێستی كورد دەگاتە رۆژئاوای كوردستان.

PUKMEDIA