رێبوار تەها: بە پرۆژە وەڵامی نەیارەکانمان دەدەینەوە

راگەیاندنی پارێزگای کەرکوک

رێبوار تەها پارێزگاری کەرکوک

بەردی بناغەی پرۆژەی چاکكردن و فراوانکردنی رێگای کەرکوک - سلێمانی دانراو و پارێزگاری کەرکوکیش رایدەگەیەنێت:" بە پرۆژەی خزمەتگوزاری وەڵامی ئەو لایەنانە دەدەینەوە کە دژایەتیمان دەکەن".

ئەمڕۆ 13ی3ی 2025 لە مەراسیمێکدا کە ژمارەیەک لە ئەندامانی ئەنجومەنی پارێزگای کەرکوک و یاریدەر و راوێژکارانی پارێزگار و ژمارەیەک بەڕێوەبەری فەرمانگەکان و ژمارەیەکی بەرچاو لە کەسایەتی و مامۆستایانی ئاینی ئامادەیبوون، رێبوار تەها  پارێزگاری کەرکوک بەردی بناغەی پرۆژەی چاکكردن و فراوانکردنی رێگای کەرکوک - سلێمانی دانا و لە وتارێکیدا دووپاتی کردەوە :" پرۆژەکە لە سۆنگەی هەستکردنی حکومەتی کەرکوکە بۆ پێشخستنی رێگاوبانەکانی شارەکە و چارەسەرکردنی کێشەی زۆربوونی رووداوەکانی هاتووچۆ و چالاکترکردنی رەوتی بازرگانی و ئابووری".

پارێزگاری کەرکوک ڕاشیگەیاند:" پرۆژەکە لە چوارچێوەی پلان و بەرنامەی حکومەت و بە چاودێری بەڕێوەبەرایەتی رێگاوبانی کەرکوک ئەنجامدەدرێت و بە شارێی بەستنەوەی کەرکوک و پارێزگاکانی دیکەی عیراق بە پارێزگای سلێمانیەوە دادەنرێت".

وتیشی:" ئێمە هەر جارەی لە گەڕەکێک خزمەت دەکەین و بە پێشکەشکردنی خزمەتگوزاری زیاتر وەڵامی ئەو لایەنانە دەدەینەوە کە دژایەتیمان دەکەن".

پڕۆژەكە بریتی یە  لە فراوانکردن و چاکكردنەوەی ڕێگاكە بەدرێژی ٢٤ کیلۆمەتر بۆ هەردوو ئاراستەی هاتن و چوون کە هەر سایدێکی ١٢ مەتر پانتر دەکرێت.

PUKMEDIA