سه‌ندیكای رۆژنامه‌نووسان: له‌سه‌ر روداوه‌كانی عه‌ربه‌ت ھیچ رۆژنامه‌نوسێك سكاڵای تۆمار نه‌كردوه‌

PUKMEDIA

سەندیکای رۆژنامەنووسانی کوردستان

لقی سلێمانی سه‌ندیكای رۆژنامه‌نووسانی كوردستان رونكردنه‌وه‌یه‌ك له‌سه‌ر روداوه‌كانی شه‌وی رابردووی ناوچه‌ی عه‌ربه‌ت بڵاوده‌كاته‌وه‌و ئاماژه‌ بۆ ئه‌وه‌ده‌كات:"ھیچ رۆژنامه‌نووسێك و میدیاكارێك نه‌ھاتووه‌ سكاڵای یاسایی تۆمار بكات، هه‌ر رۆژنامه‌نوسێكیش كه‌لوپه‌لی رۆژنامه‌وانی لێ سه‌ندراوه‌ با سكاڵا تۆمار بكات بۆ وه‌رگرتنه‌وه‌یان".


له‌ روونكردنه‌وه‌كه‌ی لقی سلێمانی سه‌ندیكای رۆژنامه‌نووسانی كوردستاندا كه‌ كۆپیه‌كی بۆ PUKMEDIA نیدراوه‌ تێیدا هاتووه‌:"پاش ئه‌و روداوانه‌ی شه‌وی رابردوو له‌ناوچه‌ی عه‌ربه‌ت روویانداو له‌ سۆشیاڵ میدیاو میدیاكاندا شیكاری جۆراوجۆریان بۆكرا، به‌ڵام تا ئه‌م ساته‌وه‌خته‌ ھیچ رۆژنامه‌نووسێك و میدیاكارێك نه‌ھاتووه‌ سكاڵای یاسایی تۆمار بكات".

ئه‌وه‌شخراوه‌ته‌ڕوو:" داواكارین ھه‌ر میدیاكارێك ئه‌گه‌ر لێیدراوه‌ یان ده‌ستگیركراوه‌ یان كه‌ولوپه‌لی رۆژنامه‌وانی ده‌ستیبه‌سه‌ردا گیراوه‌، با بێت و پێكه‌وه‌ سكاڵای ره‌سمی له‌سه‌ر لایه‌نی به‌رانبه‌ر تۆمار بكه‌ین و مافی خوراویان بۆ وه‌ربگرینه‌وه‌و یاسای كاری رۆژنامه‌وانی بكه‌ینه‌ سه‌روه‌ر نه‌ك تۆڕ‌ه‌ كۆمه‌ڵایه‌تیه‌كان".

هه‌ر له‌و باره‌یه‌وه‌ ده‌زگای ئاسایشی هه‌رێمی كوردستان له‌ راگه‌یه‌نراوێكدا كه‌ كۆپییه‌كی بۆ  PUKMEDIA نێردراوه‌، ئاماژه‌ بۆ ئه‌وه‌ده‌كات:" ده‌زگای ئاسایشی هه‌رێم وه‌ك لایه‌نی جێبه‌جێكاری یاسا ده‌ستبه‌جێ به‌مه‌به‌ستی كۆنتڕ‌ۆڵكردنی ئه‌و بارودۆخه‌ نه‌خوازراوه‌ و ڕ‌ێگریكردن له‌ ته‌شه‌نه‌كردنی ئاڵۆزییه‌كان و سه‌لامه‌تی گیانی هه‌موو لایه‌ك گه‌یشتنه‌ شوێنی ڕ‌ووداوه‌كه‌ و ڕ‌ێكاری یاسایی گرته‌به‌ر بۆ هێوركردنه‌وه‌ی بارودۆخه‌كه‌".

ئه‌وه‌شده‌خاته‌ڕوو:" له‌ئێستادا هیچ كه‌سچك ده‌ستگیرنه‌كراوه‌و هاووڵاتییه‌ برینداره‌كان له‌ نه‌خوشخانه‌ نه‌ماون".

ئه‌مه‌ش له‌كاتێكدایه‌، شه‌وی رابردوو له‌ناوچه‌ی عه‌ربه‌ت به‌هۆكاری ڕ‌ێگریكردن له‌تێپه‌ڕ‌بوونی ژماره‌یه‌ك بارهه‌ڵگر له‌لایه‌ن مامۆستایان و هاووڵاتییان، سه‌رئه‌نجام بووه‌ هۆی دروستبوونی گرژی و ئاڵۆزی له‌نێوانیاندا چه‌ند شۆفێرو هاووڵاتییه‌ك بریندار بوون و له‌لایه‌ن ده‌زگای ئاسایشی هه‌رێمی كوردستانه‌وه‌ بارودۆخه‌كه‌ ئاسایی كرایه‌وه‌.


PUKMEDIA