زانكۆی سلێمانی لە پێشبڕكێیەكی نیشتیمانیدا پلەی یەكەم بەدەستدەهێنێت

راگەیاندنی زانکۆی سلێمانی

پێشبڕكێی نیشتمانی (فیلیپ سی جیسەپ)

تیمی كۆلێژی یاسای زانكۆی سلێمانی لە پێشبڕكێی نیشتمانی (فیلیپ سی جیسەپ) لەسەر ئاستی عیراق‌ و هەرێمی كوردستان، پلەی یەكەم بەدەستدەهێنێت.


د.یۆهان عوسمان بەڕێوەبەری راگەیاندنی زانکۆی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:"بە شانازییەوە تیمی كۆلێژی یاسای زانكۆمان بۆ ساڵی ٢٠٢٥ نوێنەرایەتی عیراق‌ و هەرێمی كوردستان دەكات لە (واشنتن دی سی) پایتەختی ویلایەتە یەكگرتووەكانی ئەمریكا، تیمەكە بە سەرپەرشتی (پ.د.شاڵاو سەباح عەبدولڕەحمان‌ و د.ئەحمەد عەزیز حەسەن)و بە ئەندامێتی هەریەک لە خوێندكاران (كۆژیار محەمەد ئازاد تەها، مینا محەمەد مارف، محەمەد كاروان سابر، دییە نەوزاد فوئاد و دیما كاوە لەتیف)بەشدارن".

"پێشبڕكێی نیشتمانی (فیلیپ سی جیسەپ) لە عێراق، بە سپۆنسەری (پارێزەری ڕاوێژكار د.سەفین یاسین محەمەد ئەمین) و بە سەرپەرشتی (شیروان مەمەند فەتاح) بەڕێوەچوو، كە بەسەركەوتوویی پێشبڕكێكەیان لەسەر ئاستی عێراق ڕێكخستبوو، هەروەها خاتوو (Lilli- Noor Wouhbe) کە بەسوپاسەوە لە وڵاتی ئەڵمانیاوە و لەلایەن (ILSA) بە خۆبەخش دیاری کرابوو، ھاوکار و هەماهەنگی خوێندكارەكان بووە بە پێشکەشکردنی سەرنج و تێبینی دروست لە سەر کۆی ڕێکارەکانی پەیوەست بە پێشبڕکێکە"، د.یۆهان وایوت.

پێشبڕكێی نێودەوڵەتی (فیلیپ سی جیسەپ) گەورەترین پێشبڕكێی دادگای گریمانەییە لەسەر ئاستی جیهان، كە ساڵانە ٧٠٠ زانكۆی بەناوبانگی جیهان لە ١٠٠ وڵاتی جیهانەوە بەشداری تێدادەكەن، بەمەبەستی دادبینیكردنی ئەو كێشە یاساییەی، كە خراوەتەڕوو لە لایەن ڕێکخەرانی پێشبڕکێکەوە کە دوا دادبینی بە بەشداری و ئامادەبوونی ژمارەیەک دادوەر لە دادگای دادی نێودەوڵەتی دەبێت، هەروەها ئەم پێشبڕكێیە لە سەرەتادا لەسەر ئاستی نیشتیمانی ئەنجامدەدرێت، بەمەبەستی دیاریكردنی ئەو زانكۆیەی، كە نوێنەرایەتی وڵاتەكەی دەكات لەسەر ئاستی نێودەوڵەتی، كە لەلایەن كۆمەڵەی خوێندكارانی یاسایی نێودەوڵەتی (ILSA) بەڕێوەدەچێت.

PUKMEDIA