لەدێگەڵە 31 کەناڵ و رۆژنامەنووس پێشێلکارییان بەرامبەر دەکرێت

ئاژانسەکان

هێرشکردنە سەر مامۆستا و فەرمانبەرانی ناڕازی

مامۆستا و فەرمانبەران کە لەسلێمانییەوە بەنیازی گەیاندنی داواکاری و ناڕەزایەتییەکانیان بۆ هەولێر بەڕێوەبوون، لەبازگەی دێگەڵە ریگەیان پێنەدراو بە گازی فرمێسک ڕێژ و تەقەکردن بڵاوەیان پێکرا و پێشێلکاریش بەرامبەر بە 31 دامەزراوەی میدیایی و رۆژنامەنووسان کرا، لێپرسراوی رێكخراوی په‌یامنێران بۆ ماف و گه‌شه‌پێدانی رۆژنامه‌نووسان-یش دەڵێت:" تەنیا لە یەک رۆژدا لەلایەن هێزە ئەمنییەکانی هەولێرەوە 22رۆژنامەنووس و 9 دەزگای میدیایی پێشێلکارییان بەرامبەر کراوە، هەربۆیە داوا لە هێزە ئەمنییەکان و لایەنە سیاسییەکان دەکەین رۆژنامەنووسان لە ململانێکان بهێننە دەرەوە و پێشێلکارییان بەرامبەر نەکەن، لێگەڕێن رۆژنامەنووسان ئازادانە رووماڵی خۆیان بکەن

هۆزان قادر لێپرسراوی رێكخراوی په‌یامنێران بۆ ماف و گه‌شه‌پێدانی رۆژنامه‌نووسان بە PUKMEDIA ی راگەیاند:" لەکاتی ناڕەزایەتی دەربڕینی مامۆستایان و فەرمانبەرانی ناڕازای لەچەند ناوچەیەکی پارێزگای هەولێر بەتایبەت لەبەردەم بازگەی دێگەڵە پێشێلکاری جۆراوجۆر بەرامبەر دەزگای میدیایی و رۆژنامەنووسان ئەنجامدراون، کە سەرجەمیان جێی نیگەرانیمانن".

"داوا لە هێزە ئەمنییەکان و لایەنە سیاسییەکان دەکەین رۆژنامەنووسان لە ململانێکان بهێننە دەرەوە و پێشێلکارییان بەرامبەر نەکەن، لێگەڕێن رۆژنامەنووسان ئازادانە رووماڵی خۆیان بکەن"، هۆزان قادر وایوت.

هاوکات سەبارەت بە ئاماری ئەو پێشێلکارییانەی بەرامبەر رۆژنامەنووسان و دەزگا میدیاییەکان کراون لێپرسراوی رێكخراوی په‌یامنێران بۆ ماف و گه‌شه‌پێدانی رۆژنامه‌نووسان ئاماژەی بەوەکرد:"لەخۆپیشاندانەکەی دوێنێی هەولێردا پێشێلکاری بەرامبەر 9 دەزگایی میدیایی و 22رۆژنامەنووس کە 9 رۆژنامەنووسیان بەهۆی گازی فرمێسکڕێژەوە تەندروستیان تێکچوو، هاوکات هێزێکی ئەمنی بەئۆتۆمبێل و جلی مەدەنی بەناوی ئاساییشەوە هەڵیانکوتاوەتە سەر ئۆفیسی کەناڵی knn لە هەولێر و دەستیان بەسەر کەلوپەلی رۆژنامەوانیی و مۆبایل و پێداویستییە کەسیەکانیاندا گرتووە، هەروەها  4تیمی دەزگای راگەیاندن لەلایەن هێزە ئەمنیەکان رێگریان لێکرا بگەرێنەوە شاری هەولێر و تیمی دەزگای میدیایی پۆڵەتیک پرێسیش لەکاتی وەرگرتنی لێدوان لە چالاکوانێک لەلایەن ئاساییشەوە دەست بەسەرکراون و تائێستا ئازاد نەکراون".

PUKMEDIA