ئاسایش ٦٣٦ كەس بەتۆمەتی تیرۆر دەستگیر دەکات

PUKMEDIA

لۆگۆی دەزگای ئاسایشی هەرێم

دەزگای ئاسایشی هەرێم کاروچالاکییەکانی ساڵی ٢٠٢٤ رادەگەیەنێت و ئاشکرایدەکات لەمساڵدا ١٠ هەزار و ١٥٧ سکاڵا لەدەزگای ئاسایشی سلێمانی تۆمارکراوە و  ٦٣٦ تیرۆریست دەستگیرکراون.

عەقید سەلام عەبدولخالق بەڕێوەبەری راگەیاندنی دەزگای ئاسایشی هەرێم لەکۆنگرەیەکی رۆژنامەوانیدا کار و چالاکییەکانی دەزگای ئاسایشی هەرێمی راگەیاند و وتی:" لەساڵی ٢٠٢٤ دا ٢٥٧ ئۆپراسیۆن بۆ بەرەنگاربوونەوەی تیرۆر و ٧٤ کێوماڵ بۆ لەناوبردنەی مۆڵگەی تیرۆریستان لەناوچە جیاوازەکان ئەنجامدراون و لەئەنجامدا ٦٣٦ تیرۆریست بەپێی ماددەکانی ٢ و ٤ لەیاسای بەرەنگاربوونەوەی تیرۆر سزادراون".

" ١٢٦ کاری هاوبەش لەنێوان هێزە ئەمنییەکانی هەرێمی کوردستان و عیراق-دا ئەنجامدراون و  هەزار و ١٩ کەس بەتۆمەتی بەکارهێنان و بازرگانیکردن بەماددەی هۆشبەرەوە دەستگیرکراون، هاوکات دەستگیراوە بەسەر ٣٢٤ تۆن و ٦٠٠ گرام ماددەی هۆشبەردا"، عەقید سەلام لەکۆنگرەکەدا وایوت .

هەر کۆنگرەکەدا بەڕێوەبەری راگەیاندنی دەزگای ئاسایشی هەرێم ئاماژەی بەوەشکرد:" ٣ هەزار و٢٨٣سکاڵاو بەدواداچوون بۆ تاوانە ئەلیکترۆنییەکان کراوە و بەشێوەیەکی گشتی بەتاوانی جۆراوجۆر ١٠ هەزار و ١٥٧ سکاڵا لەدەزگای ئاسایشی سلێمانی تۆمارکراوە و ٣٢ خۆکوشتن و ٦٣ کوشتن و ١٧١ حاڵەتی تەقەکردن روویداوە".

PUKMEDIA