دواکەوتنی مووچە فەرمانگەکانی سلێمانی دادەخات

PUKMEDIA

شاری سلێمانی

بەهۆی دواکەوتنی موچەکانیانەوە بایکۆتی مووچەخۆران لەپارێزگای سلێمانی بەردەوامەو ئەمڕۆش جگە لەشوێنە هەستیارەکان بەشێک لە کارمەندان و فەرمانبەرانی تەندروستی سلێمانی بایکۆتی دەوامیان راگەیاند.

لەڕۆژانی رابردوودا بەشێکی زۆر لەخوێندنگەکان و بەڕێوەبەرایەتی هاتووچۆ و چەندین فەرمانگە و بەڕێوەبەرایەتی دیکەی سلێمانی بەهۆی دواکەوتنی مووچەکانیانەوە بایکۆتی دەوامیان راگەیاندووە و تا دێت بایکۆتی بەڕێوەبەرایەتییەکان زیاتردەبن، لەنوێترین هەڵوێستیشدا جگە لەشوێنە هەستیارەکان بەشێک لە کارمەندان و فەرمانبەرانی تەندروستی سلێمانی بایکۆتی دەوامیان راگەیاند.

لەوبارەیەشەوە هاوژین عوسمان سەرۆکی لقی سلێمانی سەندیکای کارمەندانی تەندروستی رایگەیاند:" حکومەتی هەرێمی کوردستان سێ مووچەی مووچەخۆران قەرزارەو ئەمڕۆ ٥٤ رۆژە فەرمانبەران و کارمەندانی تەندروستی مووچەیان وەرنەگرتووە".

"جگە لەشوێنە هەستیارەکانی تەندروستی کارمەندان و فەرمانبەران مافی خۆیانە بایکۆتی دەوام بکەن و تا مووچەکانیان پێنەدرێت نەگەڕێنەوە بۆ دەوام"، هاوژین عوسمان وایوت.

عیراق مووچەی مانگی ١٠ ی بۆ هەرێم ناردووە 

زیاتر لە ١٥ رۆژە حکومەتی عیراق ٧٦١ ملیار دیناری وەک مووچەی مانگی (١٠) بۆ مووچەی فەرمانبەرانی هەرێم ناردووە، بەڵام حکومەتی هەرێم بەبیانوی کورتهێنان تا ئێستا خشتەی مووچەی رانگەیاندووە و دیاریش نییە مووچەخۆران کەی مووچە وەردەگرن.

مووچەی سێ مانگی کۆتایی ئەمساڵ نادیارە

بەپێی زانیارییەکانی PUKMEDIA بڕیارە سبەینێ ١٥-١٢-٢٠٢٤وەفدێکی  وەزارەتی دارایی هەرێم بۆ مووچە سەردانی بەغدا بکات، بۆئەوەی تەواوکاری مووچەیان بۆ بنێردرێت، هاوکات حکومەتی هەرێم چاوەڕوانی ناردنی مووچەی مانگەکانی (١١ و ١٢)ش دەکات، بەڵام تا ئێستا هیچ بڕە پارەیەک بۆ مووچەی ئەو دوو مانگە نەخراوەتە سەر حسابی وەزارەتی دارایی هەرێم.

ئەمەش لەکاتێکدایە رۆژی ١١-١٢-٢٠٢٤ ئەنجومەنی وەزیرانی هەرێم کۆبووەوە و بڕیاریدا لەگەڵ ناردنی هەر بڕە پارەیەکی دیکە بۆ هەرێم لەلایەن عیراقەوە دەست بە دابەشکردنی مووچەی مانگی ١٠ بکات، بەڵام تا ئێستا مووچەی ٣ مانگی کۆتایی ئەمساڵی مووچەخۆرانی هەرێم بەنادیاری ماوەتەوە.

PUKMEDIA