سەرۆكوەزیرانی عیراق گەیشتە سلێمانی

نوسینگەی راگەیاندنی سەرۆكی یەكێتیی نیشتمانیی كوردستان

محەمەد شیاع سودانی سەرۆكوەزیرانی عیراق، بافڵ جەلال تاڵەبانی سەرۆكی یەكێتیی نیشتمانیی كوردستان

ئێوارەی ئەمڕۆ 13-11-2024، محەمەد شیاع سودانی سەرۆكوەزیرانی عیراق گەیشتە فڕۆكەخانەی نێودەوڵەتی سلێمانی و لەڕێوڕەسمێكی پڕۆتۆكۆڵیدا لەلایەن بافڵ جەلال تاڵەبانی سەرۆكی یەكێتیی نیشتمانیی كوردستان و قوباد تاڵەبانی جێگری سەرۆكوەزیرانی حكومەتی هەرێم و د. هەڤاڵ ئەبوبەكر پارێزگاری سلێمانی و ژمارەیەك لەئەندامانی مەكتەبی سیاسی یەكێتیی نیشتمانیی كوردستانەوە پێشوازی لێكرا.

بەگوێرەی زانیارییەكانی PUKMEDIA، لەپاش گەیشتنی محەمەد شیاع سودانی سەرۆكوەزیرانی عیراق بۆ شاری سلێمانی سەردانی مەزاری سەرۆك مام جەلال دەكات و دواتر لەدەباشان لەگەڵ سەرۆك بافڵ جەلال تاڵەبانی سەرۆكی یەكێتیی نیشتمانیی كوردستان كۆدەبێتەوە، تەوەری سەرەكی كۆبوونەوەكەش پرسی هەڵبژاردن و پێكهێنانی كابینەی نوێی حكومەتی هەرێم و پڕۆسەی سەرژمێری لەعیراق و بودجەو مووچەی خەڵكی هەرێم و پەرەپێدانی زیاتری پەیوەندییەكانی یەكێتی و حكومەتی عیراق دەبێت.

لەبارەی كۆبوونەوەكەشەوە، بێستون فایەق راوێژكاری سەرۆكی یەكێتیی نیشتمانیی كوردستان بە وێبسایتی رەسمی یەكێتی PUKMEDIA ی راگەیاند: "پێدەچێت یەكێك لە پرسە گرنگەكانی كۆبوونەوەكە، پرسی جارێكی دیكە كاندید بوونەوەی محەمەد شیاع سودانی سەرۆكوەزیرانی عیراق بێت بۆ ئەو پۆستە، چونكە روونە كە یەكێتیی نیشتمانیی كوردستان هێزێكی كاریگەرە لە هەرێم و عیراق و تەنانەت ناوچەكەش، لەم رونگەیەشەوە پشتیوانی یەكێتیی نیشتمانیی كوردستان بۆ سەرۆكوەزیرانی عیراق گرنگە".

"هاوكات پرسی پێكهێنانی حكومەتی نوێی هەرێم و سەرژمێری گشتی لەعیراق و مووچەو بودجەی خەڵكی هەرێم و تەوتینی مووچەخۆرانی هەرێم لەكۆبوونەوەكەدا باسدەكرێن، كەیەكێتیی نیشتمانیی كوردستان پڕۆژەی خۆی لەسەر ئەو پرسانە هەیە" بێستون فایەق وادەڵێت.

ئەمڕۆ چوارشەممە 13ـی 11ی 2024، محەمەد شیاع سودانی سەرۆكوەزیرانی عیراق بەسەردانێكی چاوەڕوانكراو گەیشتە هەولێرو لەلایەن بەشێك لەكاربەدەستانی حكومەتی هەرێم پێشوازی لێكرا، هەر لەدرێژەی سەردانەكەیدا ئێوارەی ئەمڕۆ گەیشتە شاری سلێمانی و لەلایەن سەرۆكی یەكێتیی نیشتمانیی كوردستان و جێگری سەرۆكوەزیرانی حكومەتی هەرێمەوە پێشوازی لێكرا.

PUKMEDIA