‎ موعین كازمی: تەوتین عیراق پابەند دەكات بەپێدانی مووچەی فەرمانبەرانی سلێمانی

ميدياكان

موعین كازمی ئەندامی لیژنەی دارایی ئەنجومەنی نوێنەران

 موعین كازمی ئەندامی لیژنەی دارایی ئەنجومەنی نوێنەران دڵنیایی دەداتە فەرمانبەرانی سلێمانی كەبەتەوتین كردنیان هاوشێوەی پارێزگاكانی دیكەی عیراق مووچەیان پێدەدرێت و داواش لەدەسەڵاتدارانی هەولێرو دهۆك دەكات داتا بایۆمەترییەكان بەڕاست و دروستی رەوانەی بەغدا بكەن.

موعین كازمی ئەندامی لیژنەی دارایی ئەنجومەنی نوێنەرانی عیراق لەلێدوانێكیدا بۆ كەناڵی مەسرا لەبارەی تەوتین و كردنەوەی بانكەكانی رەشیدو رافیدەین دڵنیایی دەدات و رایدەگەیەنێت: "بەتەوتینكردنی فەرمانبەران، وەزارەتی دارایی عیراق پابەند دەبێت بەپێدانی مووچەی فەرمانبەرانی سلێمانی هاوشێوەی پارێزگاكانی دیكەی عیراق".

راشیدەگەیەنێت: "داوا لەدەسەڵاتدارانی هەولێرو دهۆك دەكەین، كەبەمتمانەو شەفافیەت ناو و ژمارەو داتا بایۆمەترییەكان ئامادە بكەن بۆئەوەی متمانە لەنێوان وەزارەتی دارایی فیدراڵی و حكەمەتی هەرێمی كوردستاندا هەبێت".

ئەمەش لەكاتێكدایە بەگوێرەی زانیاری سەرچاوەیەك كە(ناوی ئاشكرا نەكردوە)و قسەی بۆ سایتی بغداد الیوم كردوە دەڵێت: "لەهەفتەی داهاتوودا لقی لەئەلڕ‌افیدەین و ئەلڕ‌ەشید، بۆ تەوتینی مووچەخۆرانی هەرێم لەسلێمانی دەكرێنەوە، جگە لەسلێمانیش، لقێكی بانكی بازرگانی عیراقی لەپارێزگای هەڵەبجەو دەڤەری گەرمیان و راپەڕ‌ین دەكرێتەوە، بەئامانجی زیادكردنی سەنتەرەكانی تەوتینی مووچە لەبانكە فیدراڵییەكان".

رۆژی 21ی شوباتی 2024 دادگای فیدراڵی بڕ‌یاریدا “محەمەد شیاع سودانی سەرۆكوەزیرانی عیراق و مەسرور بارزانی سەرۆكوەزیرانی هەرێمی كوردستان پابەند بكات بەخۆجێیكردنی مووچەی فەرمانبەرانی هەرێمی كوردستان لە یەكێك لە بانكە حكومییەكانی عیراق و بەپێی رێكەوتنی هەردوو حكومەت پێویستە تا كۆتای ئەمساڵ سەرجەم مووچەخۆرانی هەرێم تەوتین بكرێن.

PUKMEDIA