ئاسایشی سلێمانی لەماوەیەكی كەمدا دزێك دەستگیردەكات

دەزگای ئاسایشی هەرێم

لۆگۆی دەزگای ئاسایشی هەرێم

بەڕێوەبەرایەتی ئاسایشی پارێزگای سلێمانی، لەماوەی شەش سەعاتدا دزێك دەستگیردەكات و تەواوی پارە دزراوەكەش كەبڕی ٥٧ ملیۆن دیناری عیراقییە، بۆ خاوەنەكەی دەگەڕێنرێتەوە.


لەڕاگەیەندراوێكی بەڕێوەبەرایەتی ئاسایشی پارێزگای سلێمانی، كەكۆپییەكی بۆ PUKMEDIA نێردراوە راگەیەندراوە: "دوای ئەوەی لەسەعات ٤ی سەرلەبەیانی ٢٠٢٤/١٠/٢٠ لەناوبازاڕی شاری سلێمانی دزێك قاسەی دوكانێك دەبڕێت و بڕی ٥٧ ملیۆن دیناری عیراقی دەدزێت و راستەوخۆ تۆمەتبار تەواوی پارەكە لەمەخزەنێكدا دەشارێتەوە، بەڕێوەبەرایەتی ئاسایشی پارێزگای سلێمانی، بەبڕیاری دادوەر، لێكۆڵینەوەو بەدواداچوونیان بۆ رووداوەكە دەستپێكردو بەسوود وەرگرتن لەتۆڕی كامێراكانی چاودێری دەزگای ئاسایشی هەرێم، لەماوەی ٦ سەعاتدا تۆمەتباری رووداوەكە دەستنیشانكراو دەستگیركرا، تەواوی پارەكەش بۆ خاوەنەكەی گەڕێندرایەوە".

ئاماژە بەوەشدراوە: "لەئێستادا تۆمەتبار بەماددەی(٤٤٣) لەیاسای سزادان راگیراوەو لێكۆڵینەوە لەكەیسەكەی بەردەوامە".

PUKMEDIA