لەژێر سێبەری حکومەت ٧٠٠ کەس لەهەولێر بێکاردەکرێت

ئاژانسەکان

شەقامی غەزالی لە هەولێر

خاوەنی ٤٥ پرۆژە لە شەقامی غەزالی لە هەولێر ناڕەزایی دەردەبڕن و نوێنەرەکەیان رایدەگەیەنێت: "بەناوی پرۆژەی نیشتەجێبونەوە ٧٠٠ کەس لە پرۆژەی شەقامی غەزالی بێکار دەکرێن و زیانی ماددی گەورەیان لێدەدرێت و هیچ لایەنێکی پەیوەندیداریش بەدەنگ سکاڵاکەمانەوە نەهاتووە".

لەشەقامی غەزالی هەولێر کە پێشتر زەوی بوەو ٤٥ پرۆژەی بە گرێبەست لەسەر دروستکراوە و مانگانەش هەر پرۆژەیەک ٢ ملیۆن بۆ ٨ ملیۆن دیناری لێ وەرگیراوە، بەڵام ئێستا داوا دەکرێت چۆڵی بکەن.

نوێنەری خاوەن پرۆژەکانی شەقامی غەزالی لە کۆنگرەیەکی رۆژنامەوانیدا رایگەیاند: "ناکرێت لە ژێر سێبەری حکومەتدا زوڵممان لێبکرێت و بەبێ هیچ ئاگادارکردنەوەیەک پرۆژەکەمان شکست پێبهێنرێت لەپێناوی ئەوەی گوایە پرۆژەی نیشتەجێبوونی دیکەی لێدروست دەکرێت".

"لە راگەیاندنەکانەوە زانیمان کەئەم شوێنە تێک دەدرێت و دەکرێتە پرۆژەی دیکە، لەکاتێکدا هەموو مانگێک خاوەنی پرۆژەکان ٢ ملیۆن بۆ ٨ ملیۆن دینار مانگانەیان داوەو بۆ شکست هێنانیشمان ئاو و کارەبا و خزمەتگوزارییان لەسەر راگرتین و ئێمەش دامانخستووە"، نوێنەری خاوەن پرۆژەکان وادەڵێت.

لەشەقامی غەزالی هەولێر ٤٥ پرۆژە هەیە کە بۆ هەر یەکێکیان نزیکی ٢٠٠ بۆ ٣٠٠ هەزار دۆلار بۆ هەر پرۆژەیەک خەرج کراوە و لەسەر ئەو زەوییە دروستکراون کە ئێستا داوای چۆڵکردنی دەکرێت.

نوێنەری خاوەن پرۆژەکان دەشڵێت: "ساڵێک و ٧ مانگە کێشەمان بۆ دروست دەکرێت و ئاوو کارەبا و خزمەتگوزاریشیان لەسەر بڕیوین تەنها بۆ ئەوەی چۆڵی بکەین و بدرێتە سەرمایەگوزارێکی تر بۆ پرۆژە و بەم کارەش ٧٠٠ کەس بێکار دەبێت و کەسیش گوێمان لێناگرێت".

PUKMEDIA