یەکێتی: لەهەولێر کۆتایی بەدەسەڵاتی خۆسەپێن و دوکەڵی ژەهراوی دێنین

PUKMEDIA

هەولێر بە دوکەڵ داپۆشراوە

مەڵبەندی ٣ی هەولێر پەیامێک بڵاودەکاتەوەو رایدەگەیەنێت" : هەولێر لەدۆخێکی  زۆر خراپی ژینگەیی دایە ، مەترسی پیسبوونی ژینگەی هەولێر ئەوەندە گەورەیە ، بۆتە جێی باس و نیگەرانی میدیا و ناوەندە دیپلۆماسیەکان، بۆیە بەدەنگی دلێری هەولێریەکان کۆتایی  بەدەسەڵاتی خۆسەپێن و دوکەڵی ژەهراوی دێنین".

مەڵبەندی 3 ی هەولێری یەکێتیی نیشتمانیی کوردستان لەپەیامی ئەمڕۆیدا بە ناونیشانی ( دەسەڵاتی خۆسەپێن و دوکەڵەکەی هەولێر)، رایگەیاند: "هەولێر کۆمەڵێك ناو و نازناوی زۆر جوانی هەیە ، بەڵام ئێستا بەهۆی دوکەڵە ژەهراویەکەی کە شەوانە هەولێری پێ قانگ دەدەن ، ناو نازناوە جوانەکانیشی بزربووینە، هەولێر لەدۆخێکی  زۆر خراپی ژینگەیی دایە ، مەترسی پیسبوونی ژینگەی هەولێر ئەوەندە گەورەیە ، بۆتە جێی باس و نیگەرانی میدیا و ناوەندە دیپلۆماسیەکان و  ئاژانسە جیهانیەکانیش ، بەڵام ئیدارەی هەولێر ، نەك هەر بێ باکە لەبەرامبەر پیسبوونی ژینگەی شارەکە ، بەڵکو لەهەوڵی بەفەرمیکردنی سەرچاوەی دوکەڵەکانیش دایە و دارستان و پارکەکانی هەولێر ، دەرەقەتی ئەم هەموو بێباکی و دوکەڵەی ئیدارەی شارەکە نایەن ، لەبەر ئەوەی ڕێژەی سەوزایی و دارستانەکانیش ، لەدەرەوەی ستانداردی جیهانین".

"لەهەولێر نزیکەی 300 پاڵاوگەی قاچاغ و زیاتر لە 2600 موەلیدەی کوالێتی نزم ، کە هەر یەکەیان دوکەڵکێشێکی هەیە بۆ پیسکردنی دەوروبەری خۆیان و نزیکەی  یەك ملیۆن ئۆتومبێل کە بە بەنزین و گازی مەعمەل پێلەقە کاردەکەن ، کە ئەوەشیان سەرچاوەیەکی دیکەی پیسبوونی ژینگەی هەولێرە ، بۆیە ئێستا مردنی پێشوەخت و زۆربوونی نەخۆشی شێرپەنجە ، هەڕەشەیەکی مەترسیدارە بۆ سەر ژیانی هەولێریەکان، بۆیە بەدەنگی دلێری هەولێریەکان کۆتایی  بەدەسەڵاتی خۆسەپێن و دوکەڵی ژەهراوی دێنین"، لە پەیامەکەدا وا هاتووە.

PUKMEDIA