قوباد تاڵەبانی: عیراق مووچە بەبایۆمەتری دەنێرێت

PUKMEDIA

قوباد تاڵەبانی

قوباد تاڵەبانی جێگری سەرۆكوەزیرانی هەرێم رایدەگەیەنێت: "هەنگاوەكانی چارەسەری كێشەی مووچە بەرەو پێشەوە دەچن و پێویستە ئەو مووچەخۆرانەی كە تائێستا بایۆمەتریان نییە بایۆمەتریان بۆ بكرێت، چونكە حكومەتی عیراق بۆ مووچە پشت بەو بایۆمەترییە دەبەستێت".

قوباد تاڵەبانی جێگری سەرۆكوەزیرانی هەرێم جوتیارانی بەشداربووی فێستیڤاڵی ساغكردنەوەی بەرهەمە ناوخۆییەكانی رانیەی بەسەركردەوەو لەوەڵامی رۆژنامەنوساندا رایگەیاند: "بەهەموو شێوەیەك پشتیوانی جوتیاران دەكەین بۆ بەرهەمهێنان و ساغكردنەوەی بەرهەمەكانیان، خۆشحاڵم كە ئەو هەموو بەروبومە كوردەواری و بەتامانە لەم سنوورەدا هەن و هەوڵی گرنگیپێدانی زیاتری دەدەین".

هەر لەوەڵامی رۆژنامەنووساندا سەبارەت بە دابەشكردنی مووچەی مانگی هەشت جێگری سەرۆكوەزیران رایگەیاند: "بۆ چارەسەری كێشەی مووچە گفتوگۆكانمان لەگەڵ حكومەتی فیدراڵ بەردەوامەو هەموو رۆژێك هەنگاوێك بەرەو پێشەوە دەچین، لەگەڵ ئەوەی كێشەو بەربەست هەن، بەڵام پێویستە ناوماڵی خۆمان رێكبخەین و هەوڵبدەین ئەو مووچەخۆرانەی كە تائێستا بایۆمەتریان نییە بایۆمەتریان بۆ بكرێت چونكە حكومەتی عیراق بۆ مووچە پشتی بەو بایۆمەترییە بەستووە".

لەبارەی سەرژمێری گشتی عیراقەوە كە بریارە رۆژی 20-11-2024 ئەنجامبدرێت جێگری سەرۆكوەزیران رایگەیاند: "بەگرنگییەوە لەو پرسە دەڕوانین بەتایبەت بۆ ناوچەكانی ماددەی 140 لەم روانگەیەشەوە وەزارەتەكانی پلاندانانی هەرێم و عیراق هەماهەنگن لەپێناو ئەوەی سەرژمێرییەك ئەنجامبدرێت كە لەخزمەتی وڵاتدابێت نەك بۆ مەرامی سیاسی".

PUKMEDIA