قوباد تاڵەبانی و هەڤاڵ ئەبوبەكر: هەمووان هاوكاربن لەخزمەتكردنی زیاتری سلێمانی

نوسینگەی راگەیاندنی قوباد تاڵەبانی

قوباد تاڵەبانی جێگری سەرۆك وەزیران و د. هەڤاڵ ئەبوبەكر پارێزگاری سلێمانی

قوباد تاڵەبانی جێگری سەرۆك وەزیران، پێشوازی لە د. هەڤاڵ ئەبوبەكر پارێزگاری سلێمانی كردو لە كۆبوونەوەی نێوانیاندا گفتوگۆ لەبارەی دۆخی خزمەتگوزارییەكانی پارێزگای سلێمانی و چۆنییەتی جێبەجێكردنی ئەو بڕیارانەی لە ئەنجومەنی وەزیرانەوە سەبارەت بە پارێزگای سلێمانی دەرچوێنراوە كرا.

لە كۆبوونەوەكەدا كە رۆژی 14ی ئابی 2024 لە ئەنجومەنی وەزیران بەڕێوەچوو، جێگری سەرۆك وەزیران ستایشی د. هەڤاڵ ئەبوبەكری كرد بەوەی هەمیشە خەمخۆرانە و بە دیدێكی كراوەو بەرپرسیارانەوە هەوڵی خزمەتكردنی هاووڵاتییانی پارێزگای سلێمانی و چارەسەركردنی كێشەكانی داوە، لە بەرامبەریشدا پارێزگاری سلێمانی سوپاسی قوباد تاڵەبانی كرد كە لە هەموو قۆناغەكاندا پشتیوانی بووە لە سەرخستنی كاروبارەكان و چارەسەكردنی كێشە ئیدارییەكانی ناو پارێزگای سلێمانیدا.

لە بەشێكی كۆبوونەوەكەدا گفتوگۆ لەبارەی ئەو بڕیارانەی لە سەرۆكایەتیی ئەنجومەنی وەزیرانەوە سەبارەت بە پارێزگای سلێمانی دەرچوێندراون كرا، هەردوولا هاوڕابوون كە دەبێت هەموو لایەنە پەیوەندیدارەكانی پارێزگای سلێمانی پێكەوە هاوكار و هەماهەنگ بن بۆ ئەوەی بڕیارەكان بەزووترین كات و بە شێوەیەك جێبەجێ بكرێن كە زۆرترین خزمەتی هاووڵاتییانی پارێزگای سلێمانی بكرێت.

PUKMEDIA