دەزگای ئاسایشی هەرێم نزیكەی 130 كیلۆ ماددەی هۆشبەر دەسووتێنێت

PUKMEDIA

كۆنگرەی رۆژنامەوانی بەڕێوەبەری راگەیاندنی دەزگای ئاسایشی هەرێم

دەزگای ئاسایشی هەرێم لەناوبردنی نزیكەی 130 كگم ماددەی هۆشبەر رادەگەیەنێت كە لەماوەی حەوت مانگی رابردوودا دەستیبەسەردا گیراوەو دادوەر فەرمانی كۆتایی بۆ سووتاندنیان دەركردووە، بەڕێوەبەری راگەیاندنی دەزگای ئاسایشی هەرێمی كوردستانیش دەڵێت: "638 بەكارهێنەرو بازرگانی ماددەی هۆشبەر دەستگیركراون و بەراورد بە 7 مانگی ساڵی رابردوو بازرگانیكردن بە ماددەی هۆشبەر زیادیكردووە".

عەقید سەلام عەبدولخالق بەڕێوەبەری راگەیاندنی دەزگای ئاسایشی هەرێمی كوردستان لە كۆنگرەیەكی رۆژنامەوانیدا رایگەیاند: "لەو ماددە هۆشبەرانەی كە لەحەوت مانگی رابردوودا دەستیانبەسەردا گیراوە، بڕیاردراوە بڕی 4 كیلۆو 777 گم تلیاك و 15 كیلۆو 71 گم كریستاڵ و 250 ملیۆن دەنك حەبی جۆراوجۆری ماددەی هۆشبەرو 19 كیلۆو 415 گم حەشیش و 4 كیلۆگرام (methamphetamine) و زیاتر لە 50 كیلۆگرام مۆرفین و زیاتر لە 31 كیلۆگرام ماددە جۆربەجۆرەكانی دیكەی هۆشبەر بسووتێندرێن".

راشیگەیاند: "لیژنەیەك بۆ سووتاندنی ئەو ماددە هۆشبەرانەی دەستیانبەسەردا گیراوە پێكهێندراوە كە پێكهاتووە لەئەندامی بەڕێوەبەرایەتی تەندروستی سلێمانی و سەرۆكایەتی تێهەڵچوونەوەی ناوچەی سلێمانی و بەڕێوەبەرایەتی نەهێشتنی ماددە هۆشبەرەكانی سلێمانی و فەرمانی كۆتایی لەدادوەر بۆ سووتاندنیان وەرگیراوە، ئەمەش لەكاتێكدایە هەوڵ هەبووە بۆ ئەوەی ئەو ماددانە بۆ شارەكانی ناوەڕاست و خواروی عیراق بگوێزرێنەوە كە سەرچاوەكانیان دەرەوەی هەرێم بووە".

"هاوكات بەپێی بڕیاری دادوەر 638 تۆمەتباری بەكارهێنەرو بازرگانی ماددەی هۆشبەر بەپێی یاسای بەرەنگاربوونەوەی ماددە هۆشبەرەكان دەستگیركراون كەنزیكەی 250 كەسیان ئاڵودەبوو بوون، بەراورد بە 7 مانگی ساڵی رابردووش بازرگانیكردن بە ماددەی هۆشبەر زیادیكردووە" عەقید سەلام عەبدولخالق وایوت.

وتیشی: "كارگەكەی گەرمیان كەتایبەت بوو بە بەرهەمهێنانی ماددەی هۆشبەر لەسەرەتای دامەزراندنیدا بووەو تائێستا 5 كەس دەستگیركراون و لێكۆڵینەوەش بەردەوامە، هاوكات كارگەكەش لەژێر چاودێری دادگادایە".

لەبارەی دەستگیركردنی رەگەزی مێ بەتێوەگلان لەبەكارهێنانی ماددەی هۆشبەر بەڕێوەبەری راگەیاندنی دەزگای ئاسایشی هەرێمی كوردستان رایگەیاند: "رێژەیەكی كەم لەرەگەزی مێ لەناو دەستگیركراوەكاندا هەن و زۆربەی تۆمەتبارەكان لەرەگەزی نێرن".

PUKMEDIA