له‌پێناو به‌رژەوه‌ندی گشتی كۆبوونه‌وه‌ی ئه‌نجومه‌نی پارێزگاری كه‌ركوك دواده‌خرێت

PUKMEDIA

ئەنجومەنی پارێزگای کەرکوک

فراكسیۆنه‌كانی كه‌ركوك هێز و ئیراده‌مانه‌و بابلیۆن راگه‌یه‌نراوێك له‌باره‌ی دواخستنی دانیشتنی ئه‌مڕۆی كۆبوونه‌وەی ئه‌نجومه‌نی پارێزگای كه‌ركوك بڵاوده‌كه‌نه‌وه‌و ئاماژه‌ بۆ ئه‌وه‌ده‌كه‌ن:" له‌په‌رۆشیمان بۆ ته‌واوكردنی رێكاره‌كانی پێكهێنانی حكومه‌تی خۆجێیی پارێزگای كه‌ركوك به‌به‌شداری پێكهاته‌كان به‌و جۆره‌ی له‌به‌رژه‌وه‌ندی هاووڵاتیاندا بێت بڕ‌یارماندا به‌ دواخستنی دانیشتنی ئه‌نجومه‌نه‌كه‌ بۆ هه‌فته‌ی داهاتوو".

له‌ راگه‌یه‌نراوه‌ هاوبه‌شه‌كه‌ ئه‌وه‌شخراوه‌ته‌ڕوو: "له‌پاش ئه‌وه‌ی له‌لایه‌ن هێزه‌سیاسیه‌كانی ئه‌نجومه‌نی پارێزگای كه‌ركوكه‌وه‌ داواكرابوو كاتی زیاتریان پێبدرێت بۆ رێكخستنی به‌شداریكردنیان له‌كۆبوونه‌وه‌ی ئه‌نجومه‌نی پارێزگای كه‌ركوك، هاوكات وه‌ك وه‌ڵامدانه‌وه‌یه‌ك بۆ سه‌رۆك وه‌زیرانی عیراق، بڕ‌یارماندا به‌ دواخستنی دانیشتنی ئه‌مڕۆ پێنج شه‌ممه‌ی كۆبوونه‌وه‌ی ئه‌نجومه‌نه‌كه‌ بۆ سه‌ره‌تای هه‌فته‌ی داهاتوو".

ئه‌و دوو فراكسیۆنه‌ ئاماژه‌یان بۆ ئه‌وه‌شكردوه‌:" په‌رۆشین بۆ ته‌واوكردنی رێكاره‌كانی پێكهێنانی حكومه‌تی خۆجێی پارێزگای كه‌ركوك به‌ به‌شداری پێكهاته‌كان به‌و جۆره‌ی له‌به‌رژه‌وه‌ندی هاووڵاتیاندا بێت".

ئه‌مه‌ش له‌كاتێكدایه‌، رۆژی 11-7-2024 یه‌كه‌م كۆبونه‌وه‌ی ئه‌نجومه‌نی پارێزگای كه‌ركوك به‌ ئاماده‌بوونی ئه‌ندامانی ئه‌نجومه‌نی پارێزگاكه‌و نوێنه‌ری سه‌رۆكوه‌زیرانی عیراق و نوێنه‌ری لایه‌نه‌ سیاسییه‌كان ئه‌نجامدرا، كه‌له‌لایه‌ن راكان جبورییه‌وه‌ وه‌ك به‌ته‌مه‌نترین ئه‌ندامی ئه‌نجومه‌نه‌كه‌ سه‌رۆكایه‌تی به‌ڕێوه‌چوو و به‌پێی یاسا پێویسته‌ له‌دوای ئه‌و واده‌یه‌وه‌ له‌ماوه‌ی 30 رۆژدا حكومه‌تی خۆجێی كه‌ركوك دروستبكرێت، كه‌ له‌ئێستادا ته‌نها یه‌ك هه‌فته‌ كات له‌به‌رده‌م ئه‌نجومه‌نه‌كه‌دا ماوه‌.

PUKMEDIA