سەعدی پیرە: بەهەڵبژاردن شەڕی خاک دەکەین

PUKMEDIA

سەعدی پیرە

بەشداری کارای کورد لە هەڵبژاردنی ئەنجومەنی پارێزگاکانی عیراق بەتایبەت لە کەرکوک سەلماندییەوە کەکورد هەرگیز دەستلەیەک بست خاکی باوک و باپیری هەڵناگرێت و وتەبێژی یەکێتیی نیشتمانیی کوردستانیش دەڵێت: "هەڵبژاردنی ئەنجومەنی پارێزگاکانی عیراق بۆ کورد شەڕی خاکە نەک بیرورای سیاسی".

سەعدی ئەحمەد پیرە وتەبێژی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند: "هەڵبژاردنی ئەنجومەنی پارێزگاکانی عیراق بۆ عیراق بە گشتی و ناوچە جێناکۆکەکان بە تایبەتی لەناویشیاندا بۆ کەرکوک زۆر گرنگ بوو، چونکە بۆ ئێمەی کورد هەڵبژاردنەکە پرسی خاک بوو، نەک بیروڕای سیاسی، ئەمڕۆش کە کەرکوکییەکانمان دەبینی بەو گڕوتینەوە بەشداری هەڵبژاردنیان دەکرد، دڵخۆشبوین کە دەیانەوێت لەرێی دەنگەکانیانەوە کوردستانیبونی شارەکە بسەلمێننەوە".

"لەپارێزگای نەینەواش کە بە عیراقی بچوککراوە ناو دەبرێت، گرنگە کورد دەنگی هەبێت و گۆڕانکاری ئیداری لە پارێزگاکەدا بکات، چونکە پێمانوایە لەدوای ئەو کارەساتەی داعش بەسەر ئەو شارەیدا هێناوە خەڵکی شارەکە پێویستیان بە خزمەتگوزاری زیاتر و پێکەوە ژیانی زیاترە، جێی خۆیەتی هەر لێرەشەوە ئاماژە بەوە بدەم کە کاندیدەکانی یەکێتیی نیشتمانیی کوردستان لە کەرکوک و نەینەواو هەموو ناوچە جێناکۆکەکان کاندیدی زۆر باش بون و دەتوانن گۆڕانکاری بکەن"، سەعدی پیرە وای وت.

وتەبێژی یەکێتی ئەوەش دەڵێت: "بەزۆرینەی بەدەستهێنانی کورسییەکانی ئەنجومەنی پارێزگای کەرکوک دەتوانین پارێزگارێکی کوردی یەکێتی بۆ پارێزگاکە دەستنیشان بکەین و سەرجەم پێکهاتەکان لەسایەیدا خزمەتگوزارییان پێبگات و پێکەوە بە ئاشتییانە بژین، هەروەها داوا لە کۆمسیۆنی باڵای سەربەخۆی هەڵبژاردنەکانی عیراق دەکەین بەیاسایی ئەو کێشانە چارەسەربکات کە لەکاتی هەڵبژاردندا روبەرووی دەنگدەر بوەتەوەو بێبەش کراون لە دەنگدان".

PUKMEDIA