ئاسۆ مامەند: کەرکوکییەکان متمانەیان بە کاندیدەکانی یەکێتی هەیە

PUKMEDIA

ئاسۆ مامەند

سەرۆکی قەوارەی هاوپەیمانی کەرکوک هێز و ئیرادەمانە دەڵێت: "جێی دڵخۆشییە خەڵکی کەرکوک جۆش و خرۆشیان بۆ هەڵبژاردن هەیە و هەر دەنگێک لە کەرکوک بۆ کورد گرنگە، جەماوەرێکی زۆری کەرکوکیش متمانەیان بە کاندیدەکانی یەکێتیی نیشتمانیی کوردستان هەیە و دەشزانن یەکێتی ژمارەیەکی زۆر شەهیدی بۆ پاراستنی کەرکوک داوە.

ئاسۆ مامەند سەرۆکی قەوارەی کەرکوک هێز و ئیرادەمانە لە دیدارێکی کەناڵی ئاسمانی گەلی کوردستاندا رایگەیاند: "یەکێتیی نیشتمانیی کوردستان لە هیچ بارودۆخێکدا کەرکوکی جێ نەهێشتووە و هەوڵی پارێزگاری کردنی خەڵکی خۆی داوا لەو شارە، وەک کورد و وەکو یەکێتیش خۆمان بەخاوەنی ئەم شارە دەزانین و لەم بارودۆخەی ئێستاشدا کەدەسەڵاتەکان لەدەستی عەرەبدایە ڕێگریمان لە ناهەقییەکان بەرامبەر کورد و تورکمان کردووە، بۆیە هەڵبژاردنی ئەنجومەنی پارێزگاکانی عیراقمان زۆر بە گرنگ زانیوە".

"بەشداری نەکردنی کورد بەیەکەوە زیانێکی زۆری هەبوو بەداخەوە ، بەڵام ئێستاش هەر دەنگێک بۆ کورد گرنگە، خەڵکی کەرکوک شایەتی بۆ ئەوە دەدات کەکێ لەگەڵیان ماوەتەوە، دەزانن کەئێمە نەبووین پۆستمان بۆ عەرەب بەجێ هێشتووە و ئەو دۆخەی ئێستای کەرکویش لێکەوتەکانی ریفراندۆمە، بۆیە داوایان لێدەکەین بچنە سەر سندوقەکانی دەنگدان و نەچونیان خزمەت بە نەتەوەکانی تر دەکات"، ئاسۆ مامەند وای وت.

ئەوەش دەڵێت: "جەماوەرێکی زۆری کەرکوک متمانەیان بە کاندیدەکانی یەکێتیی نیشتمانیی کوردستان هەیە و دەشزانن یەکێتی ژمارەیەکی زۆر شەهیدی بۆ پاراستنی کەرکوک داوە و ئەوەش قوربانیدانێکی گەورەیە".

سەرۆکی قەوارەی کەرکوک هێز و ئیرادەمانە ئەوەشی وت: "هیچ مەجالێک لەبەردەم کورددا نییە جگە لەوەی بەشداری هەڵبژاردن بکات، لەئەگەری سەرنەکەوتنی کورد لە هەڵبژاردن، غەدرێکی زۆر لە گەڕەکە کورد نشینەکان و کورد و تورکمان بەگشتی دەکرێت و بەرنامەی خراپ داڕێژراوە لە دژی کورد و تاکە ڕێگا بۆ رزگاربوون لە سیاسەتی نالەباری ئێستای کەرکوک بەشداری کردنی کارای کوردە لە هەڵبژاردن، کە ئێمە وەک یەکێتی بۆ کەرکوک باوەڕمان بەشەراکەتە و کەرکوکییەکان دەزانن ئەگەر کورد زۆرینە بێت لەئەنجومەنی پارێزگاکانەوە مافی هەموو پێکهاتەکان بەدەست دێت، ئەوەش جێی دڵخۆشییە خەڵکی کەرکوک جیاواز لەساڵانی رابردوو جۆش و خرۆشێکی زۆریان هەیە بۆ بەشداری دەنگدان".

PUKMEDIA