پەرلەمانتارێک زانیاری لەسەر 700 ملیارەکە دەخاتەڕوو

پەڕەی د.نەرمین مەعروف

كۆبوونەوەی لیژنەی دارایی لەگەڵ بەڕێوەبەری ئەو بانكانەی بڕیارە قەرز بدەنە هەرێم

لیژنەی دارایی ئەنجومەنی نوێنەرانی عیراق لەگەڵ بەڕێوەبەری ئەو بانكانە كۆبووەوە كە بڕیارە قەرز بدەن بە هەرێمی كوردستان و ئەندامێكی لیژنەكەش رایدەگەیەنێت: "بەوتەی بانكەكان پێدانی ئەو قەرزە پێویستی بە رێكاری كارگێڕییە و  ئەنجومەنی بەڕێوەبردنی بانكەكانیش بڕیاریان لەوە نەداوە ئەو قەرزە سوودی لەسەر دەبێت یاخود یان نا؟".

د.نەرمین مەعروف ئەندامی لیژنەی دارایی لە ئەنجومەنی نوێنەرانی عیراق لە لێدوانێكیدا بۆ سایتی رەسمی یەكێتیی نیشتمانیی كوردستان  PUKMEDIA رایگەیاند: "رۆژی 20-9-2023، لە چوارچێوەی بەدواداچوونەكانی لیژنەی دارایی بۆ پرسی مووچەی فەرمانبەران و پشكی هەرێمی كوردستان لە بودجەی گشتی، لیژنەی بەدواداچوونی كاری بانكەكان لە لیژنەی دارایی میوانداری بەڕێوەبەری بانكەكانی رەشید، رافیدەین، TBI-یان كرد، بۆ پرسی بڕیاری ئەنجومەنی وەزیران بۆ پێدانی 700 ملیاری دیناری مانگانە بە قەرز  بە هەرێمی كوردستان بۆ مانگەكانی 9، 10، 11".

"لە كۆبوونەوەكەدا بانكەكان ئاماژەیاندا بەوەی پێدانی ئەو قەرزە پێویستی بە چەند رێكارێكی كارگێڕی هەیە كە لە چەند رۆژی داهاتوودا  تەواو دەكرێن، سەبارەت بەوەی ئایا ئەو قەرزە سوودی لەسەرە یان نا؟ لەوەڵامدا وتیان: "ئەمە دەسەڵاتی ئەنجومەنی بەڕێوەبردنی بانكەكانە و هێشتا بڕیاریان لێ نەداوە، بەڵام لە بارمتەی ئەو قەرزە وەزارەتی دارایی فیدڕاڵ ئەسپاردەیەكی هاوتای قەرزەكە لەو بانكانە دادەنێت تا كاتی گێڕانەوەی بڕی قەرزەكە لە پاكتاوی دارایی پشكی هەرێم لە بودجەی ئەمساڵ یان ساڵی داهاتوو" د.نەرمین مەعروف وادەڵێت.

PUKMEDIA