هێزە ئەمنییەكانی هەولێر دوو رۆژنامەنوس دەستگیر دەكەن

PUKMEDIA

وێنەی دوو رۆژنامەنوسە دەستگیركراوەكە

لەكاتی رۆماڵی خۆپیشاندانێكدا دوو رۆژنامەنوسی هەولێر لەلایەن هێزە ئەمنییەكانەوە دەستگیركران و بەرەو شوێنێكی نادیار گوازرانەوەو دەستیش بەسەر كەلوپەلە رۆژنامەوانییەكانیدا گیرا.

پەیامنێرمان لەهەولێر رایگەیاند: "لەكاتی روماڵكردنی گردبوونەوەی ناڕەزایی دانیشتووانی گەڕەكی بەهاری نوێ لە هەولێر، كە لەبەرامبەر كێشەی كەمئاوی گردبوونەوە، هێزێكی ئەمنی شارەكە پەیامنێری تۆڕی میدیایی ئێستا بەناوی دیار حسێن و پەیامنێری وڵات میدیا بەناوی یاسر مەمەد دەستگیر كرد".

بەپێی زانیارییەكانی PUKMEDIA هێزە ئەمنییەكە دەستی بەسەر كەلوپەلە رۆژنامەوانییەكانی هەر دوو رۆژنامەنوسەكەدا گرتووە و بەرەو شێوێنێكی نادیار براون.

هەر لەوبارەیەشەوە د.کارزان محەمەد پسپۆڕی بواری یاساکانی ڕاگەیاندن بەسایتی رەسمیی یەکێتیی نیشتمانیی کوردستان PUKMEDIA ی راگەیاند: "بەپێی یاسای ڕۆژنامەگەری، ڕۆژنامەنووسان ئەرکی سەرشانیانە ڕووماڵی ڕووداوەکان بکەن، بەتایبەت کە پەیوەندی بەژیان و گوزەرانی خەڵکەوە هەیە".

وتیشی:"بەپێی یاسای ڕۆژنامەگەری هیچ دەسەڵات و لایەنێک مافی دەستگیرکردنی ڕۆژنامەنووسی لەکاتی بەجێگەیاندنی ئەرکەکەیدا نیە تەنها بەبڕیاری دادوەر نەبێت، بۆ سزادانیش تەنها غەرامەو قەرەبووەو نابێت ڕۆژنامەنووس لە هیچ شارێکی کوردستاندا دەستگیر بکرێت".

ئەمەش لەكاتێكدایە، ماوەی دوو ساڵە ژمارەیەك رۆژنامەنوسی بادینان لەهەولێر دەستبەسەرن و لەگەڵ ئەوەی بەشێكیان ماوەی یاسایی خۆیان تەواو كردوەو پێویستە ئازاد بكرێن، بەڵام دۆسییەی لا بەلایان بۆ دروست دەكرێت و سزادەدرێنەوە، گوهدار زێباری یەكێكە لەو رۆژنامەنوسانەی كە ماوەی یاسایی سزاكەی تەواو كردوە، بەڵام بەبیانوی بوونی تاپڕێك لە ماڵەكەیدا كەكۆن باپیری بەكاریهێناوە، نییەتی دووبارە سزادانەوە هەیە.


PUKMEDIA