سه‌رۆكی حكومه‌ت قه‌رزی مووچه‌خۆرانی بیرچووه‌ته‌وه‌

PUKMEDIA

موچە

سه‌رۆكی حكومه‌تی هه‌رێمی كوردستان ده‌ڵێت:" له‌كابینه‌ی نۆدا هه‌موو مانگێك مووچه‌ی مووچه‌خۆرانمان له‌كاتی خۆیدا دابه‌شكردوه‌، ئه‌ندامێكی لیژنه‌ی دارایش له‌ په‌رله‌مانی كوردستان ئاماژه‌ بۆ ئه‌وه‌ده‌كات:" سه‌رۆكی حكومه‌ت بریچووه‌ته‌وه‌ نزیكه‌ی 10 ترلیۆن دینار قه‌رزاری مووچه‌خۆرانی هه‌رێمه‌و لێبڕینی مووچه‌و كه‌مكردنه‌وه‌ی مانگه‌كانی ساڵ له‌ 12 بۆ 10 مانگ دیاریی ئه‌م كابینه‌یه‌ بوو بۆ مووچه‌ خۆران".

سه‌رۆكی حكومه‌ت: هه‌موو مانگێك مووچه‌مان دابه‌شكردوه‌

مه‌سرور بارزانی سه‌رۆكی حكومه‌تی هه‌رێمی كوردستان له‌ رێوه‌ڕ‌ه‌سمی كردنه‌وه‌ی پڕ‌ۆژه‌ی گه‌شتیاری "كۆرنیشی ده‌لال" له‌ زاخۆ، له‌ وتارێكدا رایگه‌یاند: " تا ئه‌و كاته‌ی رێگری له‌ هه‌نارده‌كردنی نه‌وتی هه‌رێمی كوردستان كرا، به‌ شانازییه‌وه‌ به‌خۆشی بێت، یان به‌ زه‌حمه‌ت هه‌موو مانگێك مووچه‌ی خه‌ڵكی هه‌رێمی كوردستانمان دابه‌شكردووه‌".

بەشێک لە وتارەکەی سەرۆکی حکومەت لە کەناڵەکەی خۆیەوە

كابینه‌ی نۆ 10 ترلیۆن دینار قه‌رزاری مووچه‌ خۆرانه‌

به‌پێی به‌دواداچوونه‌كانی ئه‌ندامێكی لیژنه‌ی دارایی له‌ خولی پێنجه‌می په‌رله‌مانی كوردستان، كابینه‌ی نۆ نزیكه‌ی 10 ترلیۆن دینار قه‌رزاری مووچه‌خۆرانی هه‌رێمه‌و نه‌یتوانیوه‌ هه‌موو مانگێك مووچه‌ بۆ مووچه‌خۆران دابین بكات.

سه‌ركۆ ئازاد گه‌ڵاڵی ئه‌ندامی لیژنه‌ی دارایی له‌ په‌رله‌مانی كوردستان به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "به‌درێژایی ته‌مه‌نی ئه‌م كابینه‌یه‌، 7 مووچه‌ی ته‌واو نه‌دراوه‌، ئه‌مه‌ جگه‌ له‌ئه‌وه‌ی مووچه‌ی مانگی 6 به‌ته‌واوی و مووچه‌ی مانگی 7ی ئه‌مساڵیش دابه‌شنه‌كراوه‌، كه‌ تێكڕ‌‌ا ده‌كاته‌ زیاتر هه‌شت ترلیۆن و سه‌د ملیار دینار".

"به‌گشتی له‌ماوه‌ی ئه‌م كابینه‌یه‌دا، 10 مووچه‌ به‌ لێبڕ‌‌ینه‌وه‌ دراوه‌،  9 مووچه‌ش به‌ لێبڕ‌‌ینی له‌ سه‌دا (٪٢١) دراوه‌، هه‌روه‌ها یه‌ك مووچه‌ش به‌لێبڕ‌‌ینی له‌ سه‌دا (٪١٨) دراوه‌، كه‌ تێكڕ‌‌ای ئه‌و پارانه‌ی مووچه‌خۆران لای حكومه‌ت هه‌یانه‌، ده‌كاته‌ یه‌ك ترلیۆن و هه‌شت سه‌د و شه‌ست و پێنج ملیار دینار"، سه‌ركۆ ئازاد گه‌ڵاڵی وایوت.

ئه‌ندامه‌كه‌ی په‌رله‌مانی كوردستان ده‌شڵێت: "كۆی گشتی قه‌رزی مووچه‌ی مووچه‌خۆرانی هه‌رێمی كوردستان كه‌له‌ ئه‌ستۆی كابینه‌ی نۆیه‌م دایه‌، بریتیه‌ له‌ ‌(٩،٩٦٥،٠٠٠،٠٠٠،٠٠٠ ) نۆ ترلیۆن و نۆسه‌د و شه‌ست و پێنج ملیار دینار".

سه‌ركۆ ئازاد گه‌ڵاڵی ئاماژه‌ بۆ ئه‌وه‌شده‌كات:" ده‌ستپێشخه‌ری لێبڕینی مووچه‌ و كه‌م كردنه‌وه‌ی مانگه‌كانی ساڵ له‌ 12 مانگه‌وه‌ بۆ 10 مانگ ده‌ستكه‌وتی سه‌رۆكی كابینه‌ی نۆ بوو بۆ مووچه‌ خۆران، به‌ڵام دیاره‌ سه‌رۆكوه‌زیران بیری چووه‌ته‌وه‌".

PUKMEDIA

ئینفۆگرافیك: قه‌رزی مووچه‌خۆران لای كابینه‌ی نۆی حكومه‌تی هه‌رێم