بەرپرسێکی پارتی: پێویستە لەپێناو کەرکوک جیاوازی حزبی بەلاوەبنێین

کەناڵی کەرکوک

د. محەمەد خورشید

یاریدەدەری مەکتەبی رێکخستنی کەرکوک - گەرمیانی پارتی دیموکراتی کوردستان رایگەیاند: "لە پێکهێنانی ئیدارەی پارێزگای کەرکوک دەبێ ھاوکاری یەکتر بکەین، بە یەک تیم لەگەڵ نەتەوەکانی تری کەرکوک گفتوگۆبکەین و جیاوازی حزبی بەلاوە بنێین".

دوا کۆبوونەوەی یەکێتی و پارتی دەرگای نوێ دەکاتەوە

د. محەمەد خورشید یاریدەدەری مەکتەبی رێکخستنی کەرکوک - گەرمیانی پارتی دیموکراتی کوردستان لەمیانی بەرنامەی میوانی کەناڵی کەرکوک رایگەیاند: "لەماوەی رابردوو کۆبوونەوەکانی ھەردوو مەکتەبی سیاسی یەکێتیی نیشتمانیی کوردستان و پارتی دیموکراتی کوردستان ئەرێنی و نەرێنی بوون، بەڵام لەدوا کۆبوونەوە لە دەباشان، ئەو پێنج خاڵەی کە لە راگەیەندراوەکەدا هاتبوو دەتوانین بڵێین کردنەوەی دەرگایەکی نوێیە".

بە یەک تیم لەگەڵ نەتەوەکانی دیکە کۆبوونەوە بکرێت

محەمەد خورشید دەشڵێت: "یەکێتی و پارتی دەبێت کۆبونەوەکانیان بەردەوامبێت و زەمینەسازی بکەن بۆ ئەوەی رێککەوتنێکی گشتگر بکەن، ھەردوولا یەکتری تێبگەیەنن کە بەڕاستی شانیان داوەتە بەر ئەم قورساییە و نابێت پارتی وا ھەست بکات بەتەنھایە و تەنیا ئەوە شانی داوەتە بەر، یەکێتیش هەست بکات لەژێر فشاردایە".

سەبارەت بە ناوچە دابڕێندراوەکانیش یاریدەدەری مەکتەبی رێکخستنی کەرکوک - گەرمیانی پارتی رایگەیاند: "لە ناوچەکانی دەرەوەی ئێدارەی ھەرێم کوردستانیان پێویستیان بەیەکترە، راستە ھەر لایەنێکی سیاسی ھەوڵدەدات بۆ خۆی و جۆرێک لەجۆرەکان جەماوەر و کورسیەکانی زیاد بکات، بەڵام ھیچ لایەنێک ناتوانێ نوێنەرایەتی ھەموو لایەک بکات، لە پێکهێنانی ئیدارەی پارێزگای کەرکوک دەبێ ھاوکاری یەکتر بکەین و بە یەک تیم لەگەڵ نەتەوەکانی دیکەی کەرکوک گفتوگۆبکەین و جیاوازی حزبی بەلاوە بنێین بۆ ئەوەی بەرەو پێش بچین، دەشتوانین بەشێک لەو شتانەی لەدەستمانداوە وەریبگرینەوە".
PUKMEDIA / کەناڵی کەرکوک