بریكاری وەزارەتی داد: ئەوەی لە هەولێر روودەدات دەستدرێژییە بۆ سەر شكۆی دادوەری

PUKMEDIA

شیلان عارف بریكاری وەزارەتی داد

بریكاری وەزارەتی داد رایدەگەیەنێت: "رفاندن و سەرتاشینی ئەو پارێزەرە دەستدرێژییە بۆ شكۆ و كۆی تەواوی خێزانی داد ودادوەری و پێویستە دەستدرێژیكاران سزابدرێن".

شیلان عارف بریكاری وەزارەتی داد لەبارەی تاشینی سەری پارێزەرێك لە هەولێر رایدەگەیەنێت: "دڵگرانم لەو رووداوە نەخوازراوانەی روودەدەن لەهەرێمی كوردستان، لەكوشتن و دەستدرێژیكردنە سەر شكۆو كەرامەتی مرۆڤ و پەنابردنەر  تۆڵەسەندنەوە و ترساندن و تۆقاندن  بۆ یەكلاكردنەوەی كێشەكان لەدەرەوەی دادگاكان، بەتایبەتی ئەو دەستدرێژیە ناڕوایەی كرایە سەر پارێزەرێك لەپایتەختی هەرێمی كوردستانگ.

"ئەم دەست درێژییە دەستدرێژییە بۆ شكۆ و كۆی تەواوی خێزانی داد ودادوەری و پێویستە هەموو هەڵوێستەی لەسەر بكەین و دەستدرێژی كاران بەسزای توند بگەیەندرێن" شیلان عارف وادەڵێت.

بریكاری وەزارەتی داد دەشڵێت: "تواناو پاڵپشتی خۆم بۆ سەندیكای پارێزەران و یەكەبەیەكەی پارێزەرانی خۆشەویست دووپات دەكەمەوە، كە ئەوان بەشێكی گرنگ و دانەبڕای خێزانی داد و دادوەرین".

شەوی ر‌ابردوو لەشاری هەولێر، چوار چەكدار هەڵیانكوتایە سەر ماڵی پارێزەری راوێژكاری محەمەد یابە و پاش بەتوندی ئەشكەنجەدان و شكاندنی دەموچاوی و چەند بەشێكی جەستەی، سەریشیان تاشی.

PUKMEDIA