هێزە ئەمنیەکانی هەولێر رێ لەچالاکییەکی یادی ئەنفال دەگرن

PUKMEDIA

هەولێر

هێزە ئەمنییەکانی هەولێر رێگەیان نەدا چالاکوانان بۆ یادی 35 ساڵەی ئەنفال گردبوونەوەیەکی مەدەنیانە بکەن. 

بڕیار بوو 13/4/2023 ژمارەیەك رێكخراو و چالاكوانی بواری جینۆساید لە هەولێر، لە یادی 35 ساڵەی ئەنفالدا لەبەردەم مۆنۆمێنتی شەهیدانی كەسنەزان بەیاننامەیەك بخوێننەوە و یادی ئەو تاوانە دژ بە مرڤایەتییە بكەنەوە، بەڵام  هێزە ئەمنییەكانی شاری هەولێر هەڵیان کوتایە سەریان و ڕێگەیان نەدا چالاكیەكە بکەن و بڵاوەیان بە چالاكوانان کرد. 

لەلایەکی تریشەوە ژمارەیەک لە کەسوکاری قوربانیانی ئەنفال نارەزایی دەردەبڕن کە زیاتر لە دوو ساڵە داوای بینینی مەسرور بارزانی سەرۆکی حکومەت دەکەن و 11 جاریش چوونەتە بەردەم بینای ئەنجومەنی وەزیران لە هەولێر، بەڵام نە وەڵامیان دەدەنەوە و نە سەرۆکی حکومەتیش ئامادەیە بیان بینێت. 

سبەی ١٤ی ٤ی ٢٠٢٣یە و یادی 35 شاڵاوی بەدناوی ئەنفالە کە رژێمی لەناوچووی بەعس بە 8 قۆناغ هێرشی سەربازی کردە سەر گوندەکانی کوردستان و زیاتر لە 182 هەزار کەسی لە ژن و پیاو و گەنج و منداڵی کۆمەڵکوژ کرد. 

بەگوێرەی بەیاننامەیەکی کەسوکاری قوربانییەکان، مووچەکانیان بڕدراوە، داوای گێڕانەوەی دەکەن، بۆ ئەو مەبەستەش ١١ جار لەشار و شارچۆکەکانەوە هاتوونەتە بەردەم ئەنجومەنی وەزیران لە هەولێر بەڵام سەرۆکی حکومەتی هەرێم وەڵامیان ناداتەوە.

PUKMEDIA