کەسوکاری کوژراوێک دەستخۆشی لەئاسایشی سلێمانی دەکەن

ئاژانسەکان

کەسوکاری کوژراوەکە

دوای ئەوەی لەچەند رۆژی رابردوودا لەلایەن ئاسایشی سلێمانییەوە چەند کەسێک لە باخێکی کێلەسپی دەستگیرکران کە پێشینەی تۆمەتبارییان هەبوو، ئەمڕۆ لەکۆنگرەیەکی رۆژنامەوانیدا کەسوکاری کوژراوەکە رایانگەیاند: بەپێی ماددەی ٤٠٦ لەلایەن دادگاوە تۆمەتباران داواکرابوون و بکوژانی کورەکەمانن، بەڵام لەلایەن کەسێکەوە داڵدەدرابوون، داواکارین یاسا باڵادەست بێت لە کەیسی کوژرانی بەناهەقی (ئارام جەمال شاسوار)،راشیدەگەیەنن"لەبەر باوەڕبوونمان بەسەروەری یاسا و بۆپاراستنی سەقامگیری ناوچەکەمان پەنامان نەبردووەتە بەر تۆڵەسەندنەوە بەدەستی خۆمان".

هەر لەکۆنگرەکەدا باوکی کوژراوەکە رایگەیاند:"داواکارم یاسا سەروەر بێت کەس دەستوەرنەداتە کەیسی کوشتنی کوڕەکەمانەوە، ئەو کەسانەی دەستگیرکراون پێشینەیان هەیە و لە مۆبایلەکانیاندا بەڵگە هەیە، بۆیە داواکارم سەرۆک بافڵ هاوکارمان بێت و کەیسەکەمان بەلاڕێدا نەبرێت، دەستخۆشی لە ئاسایشی سلێمانیش دەکەم".

دواتر هاوسەری کوژراوەکە وتی:"داوا لەسەرۆک بافل و هێزە ئەمنییەکان دەکەم کە هاوکارمان بن لەوەی کەیسەکە بەلاڕێدا نەبرێت و تاوانباران هەقی یاسایی خۆیان وەربگرن، هاوسەرەکەم بێ تاوان کوژراوە بۆ نیوسەعات چووە دەرەوەو تەرمەکەیمان بۆ هاتەوە".

هاوکات ئەو هاووڵاتییەی لە رووداوەکەدا بریندار بوو بەم شێوەیە چیرۆکەکەی گێڕایەوە:"من خۆم ئەندازیاری کشتوکاڵیم و لەو گوندە زەویوزارمان هەیە، پێنج دەقە پێش رووداوەکە جوانەمەرگ پێی وتم ئەو ماڵە گللەییان کردووە کە ئاو کۆبووەتەوە لە نزیکیانەوە چووم یارمەتیم یاون و پێم وتون، سبەینێ شۆفڵ دەهێنم و چارەسەری دەکەم".

وتیشی:"پێشتر ئێمە هیچ کێشەیەکمان لەگەڵ ئەو ماڵەدا نەبووەو کاتێک سەرقاڵی چاککردنی ئەو ئاوەبوون جوانەمەرگ چوو تا پێیان بڵێت تێچووەکەیتان دەدەمەوە، بەڵام بووە دەمەقاڵێ و تەقەیان کرد لەئەنجامدا ئەو شەهیدبوو منیش برینداربووم".

پاشنیوەڕۆی رۆژی هەینی ١٧-١٢-٢٠٢١ سەعات ٤:٠٠ عەسر لەگوندی کێلەسپی، موختاری گوندەکە خۆی کوڕەکانی هەستان بەکوشتنی (ئارام جەمال شاسوار)، دوای زیاتر لە ساڵێک هەڵهاتن و داڵدەدانیان لەچەند رۆژی رابردوودا لەلایەن ئاسایشی سلێمانییەوە دەستگیرکران و کەسوکارەکەشی داوای سەروەری یاسا دەکەن.

PUKMEDIA