سکرتێری گشتی نەتەوە یەکگرتووەکان: لە هەرێم مافی مرۆڤ پاشەکشێ نەکات

PUKMEDIA

ئەنتۆنیۆ گۆتێریس سكرتێری گشتی نەتەوەیەكگرتووەكان

پاشەکشێی مافی مرۆڤ لە هەرێمی کوردستان بووەتە جێی نیگەرانی رێکخراو و نوێنەرانی وڵاتان، سکرتێری گشتی نەتەوە یەکگرتووەکانیش لەسەردانیدا بۆ لای سەرۆکی پەرلەمان دەڵێت: "پێویستە رێگە نەدرێت هەرێمی كوردستان پاشەكشێ لە رەوشی مافەكانی مرۆڤ بكات".

لە هەولێر بەشێوەیەکی مەترسیدار ئەشکەنجەی زیندانیان دراوە

حه‌وت گه‌نجی هه‌ولێر له‌لایه‌ن ئاسایشی پارتییه‌وه‌ ده‌ستگیرده‌كرێن بە توندترین و مه‌ترسیدارترین شێوه‌ ئه‌شکه‌نجه‌ دراون، باوکی یەکێک لە گەنجەکانیش رایگەیاند: "سێ شه‌و و رۆژ كوڕه‌كه‌میان ئه‌شكه‌نجه‌داوه‌، كاره‌بایان لێداوه‌، گونیان قۆڕكردووه‌، بتڵی پیپسیان پێهه‌ڵگرتووه‌، شانیان له‌ژێر ئه‌شكه‌نجه‌دا شكاندوه‌".
دەشڵێت:" دادگای هەولێر کوڕەکەمی بەماددەی تیرۆر سزادا، لەکاتێکدا کوڕەکەم خوێندکاری زانکۆیە و دوورە لەو فکرەیەوە".

ئازادییە گشتییەکان بەرتەسک نەکرێتەوە

ئەمەش لەکاتێکدایە، رۆژی 2-3-2023، ئەنتۆنیۆ گۆتێریس سكرتێری گشتی نەتەوەیەكگرتووەكان، سەردانی هەرێمی کوردستانی کردو لەگەڵ د. رێواز فایەق سەرۆکی پەرلەمانی کوردستان باسیان لە رەوشی مافەكانی مرۆڤ و فراوانتركردنی پانتایی ئازادیی کرد لە هەرێمی كوردستان و لەوبارەیەوە سكرتێری گشتی نەتەوەیەكگرتووەكان رایگەیاند: "پێویستە هەرێمی كوردستان پاشەكشێ لە رەوشی مافەكانی مرۆڤ نەكات و ئازادییە گشتیەكان بەرتەسك نەكرێنەوە و رێزی تەواو لە بنەما دیموكراسیەكان بگیرێت".

پێشتریش رێکخراوە نێودەوڵەتییەکان و کونسوڵی وڵاتان نیگەرانی خۆیان دەربڕیوە لە پاشەکشێی مافەکانی مرۆف بەتایبەت لە بەشێکی دیاریکراوی هەرێمی کوردستان و داوادەکەن رێگە نەدرێت ئازادی مافی مرۆڤ و ئازادی رادەربڕین و ئازادی راگەیاندن لەوە زیاتر لەهەرێمی کوردستان پێشێل بکرێت.
PUKMEDIA