سه‌رۆكی یه‌كێتی وه‌ڵامی 120 پرسیار ده‌داته‌وه‌

بافڵ جەلال تاڵەبانی سەرۆکی یەکێتیی نیشتمانیی کوردستان

بافڵ تاڵه‌بانی سه‌رۆكی یه‌كێتیی نیشتمانی كوردستان له‌ نوێترین دیداریدا به‌ووردی و حه‌وسه‌ڵه‌وه‌ وه‌ڵامی 120 پرسیاری رۆژنامه‌نوسێكی بیانی ده‌داته‌وه‌و په‌یامه‌ سیاسییه‌كانی به‌ دیقه‌ت و ئاڕاسته‌كراوه‌وه‌ ده‌نێرێت.

سه‌رۆكی یه‌كێتی زۆر راشكاوانه‌ په‌نجه‌ ده‌خاته‌ سه‌ر كێشه‌كانی حكومڕانی له‌هه‌رێم و خراپی ئیداره‌دانی كه‌یسی نه‌وت و غاز له‌هه‌رێم و رێگه‌چاره‌كانیش وه‌ك سیاسییه‌كی دووربین ده‌خاته‌ڕوو، كه‌ زۆرترین پرسیاریش له‌سه‌ر نه‌وت و غازه‌.

سه‌رۆك بافڵ دۆخی هه‌رێم په‌یوه‌ندییه‌كانی یه‌كێتی و پارتی به‌خراپ ده‌زانێت، به‌ڵام شه‌ڕی ناوخۆ به‌توندی ره‌تده‌كاته‌وه‌و بوێرانه‌ ده‌ڵێت: "مه‌گه‌ر به‌سه‌ر لاشه‌ی مندا شه‌ڕی ناوخۆ رووبدات".

پێشتریش سه‌رۆكی یه‌كێتی له‌سه‌ر هه‌نارده‌ی غاز به‌هه‌مان شێوه‌یه‌ وتی: "مه‌گه‌ر به‌سه‌ر لاشه‌ی مندا غاز هه‌نارده‌ بكرێت"، ئه‌گه‌ر بێت و به‌ده‌ردی نه‌وت ببرێت و سوودی بۆ كۆمه‌ڵانی خه‌ڵك نه‌بێت.

له‌چاوپێكه‌وتنه‌كه‌دا سه‌رۆكی یه‌كێتی ئامانجی ئه‌و وته‌یه‌ی له‌سه‌ر غاز ئاشكراكرد، كه‌ ئه‌نجامه‌كه‌شی ده‌ستكه‌وتووته‌وه‌و ده‌ڵێت: "دوای ماوه‌یه‌ك وه‌فدێك له‌هه‌ولێره‌وه‌ هات و داوای ئه‌وه‌یان لێكردم له‌نێوان یه‌كێتی و پارتیدا به‌ش بكرێت"، به‌ڵام وه‌فده‌كه‌ ده‌كاته‌ ده‌ره‌وه‌و وه‌ك خۆی ده‌ڵێت: "له‌ مێشكی خۆمدا وام دانابوو باسی ستراتیجی هه‌نارده‌و بوژاندنه‌وه‌ بكه‌ن، به‌ڵام وانه‌بوو، چونكه‌ : "غاز موڵكی یه‌كێتی و پارتی نیه‌و موڵكی خه‌ڵكی كوردستانه"‌.

په‌یامی سه‌رۆكی یه‌كێتی له‌باره‌ی پرسی غازه‌وه‌ روونه‌و وه‌ك خۆی بۆ پێگەی Iraq Oil Report ده‌ڵێت: "تاكه‌ كێشه‌ی ئێمه‌ له‌گه‌ڵ هه‌نارده‌ی غازی سروشتی ئه‌وه‌یه‌، نامانه‌وێت به‌خراپی به‌ڕێوه‌ببرێت وه‌ك نه‌وت، ئه‌گه‌ر غازیش به‌شێوه‌یه‌كی خراپ به‌ڕێوه‌به‌رین هه‌رێمی كوردستان تووشی كاره‌سات ده‌بێت".

PUKMEDIA