Pêşangeha Yekemîn a Pirtûkên Kurdî sê rojên din hat dirêj kirin

Taybet

Wêneyê Pêşangehê

Biryar hat dayîn ku, Pêşangeha Yekemîn a Pirtûkên Kurdî ku di bin dirûşma "Pirtûka kurdî ziman û nasnameya me ye" de hate vekirin, dê ji bo sê rojên din were dirêjkirin û serpereştiyarê pêşangehê ragihand: 30 hezar pirtûk hatine firotin û nivîsgeha Cîgirê Serokwezîrê Herêmê Qubad Talebanî hezar pirtûk ji bo pirtûkxaneyên giştî yên bajar û bajarokan dikire.

Serpereştiyarê Pêşangeha Pirtûkên Kurdî ya li bajarê Silêmaniyê, Rewez Hemesalih, da xuyakirin ku Nivîsgeha Cîgirê Serokwezîrê Herêma Kurdistanê Qubad Talebanî biryar da ku ji navend û dezgehên cuda yên pêşangehê hezar pirtûkan bikire da ku bide pirtûkxaneyên giştî yên bajar û bajarokan û ev gav cihê spasiyê ye.

Îşev Şemî, 22.08.2026an, di kongreyeke rojnamevanî de, Rewez Hemesalih diyar kir ku piraniya armancên pêşangehê pêk hatine û tevî ku îro roja dawî ya pêşangehê bû jî, li ser daxwaza gelek xwendevanan wan biryar daye ku Pêşangeha Yekemîn a Pirtûkên Kurdî li Silêmaniyê sê rojan dirêj bikin; lewma pêşangeh dê heta 25ê Tebaxa 2026an, demjimêr 11ê şevê vekirî bimîne.

Her wiha da zanîn û got: Di nava van 10 rojan de zêdetirî 30 hezar pirtûk hatine firotin em li bendê bûn ku hejmareke mezintir bifiroşin, lê ji ber hin rewşan di vê astê de ma ye.

Rewez Hemesalih eşkere kir ku ev pêşangeh bi beşdariya zêdetirî 45 navend û dezgehên çap û weşanê ji Başûr û Rojhilatê Kurdistanê hatiye vekirin û di dema niha de jî ew amadekariyan dikin daku di sala pêş de navend û dezgehên çap û weşanê yên Bakur û Rojavayê Kurdistanê jî tê de beşdar bibin.

Ev yek di demekê de ye ku Pêşangeha Yekemîn a Pirtûkên Kurdî di bin navê "Pirtûka kurdî ziman û nasnameya me ye" de di 13ê Tebaxa 2026an de li Family Mall a Silêmaniyê hatibû vekirin. Biryar bû ku ji bo dema 10 rojan heta îro (22.08.2026) demjimêr 11ê şevê berdewam be, lê niha hate biryar kirin ku dema pêşangehê sê rojan were dirêjkirin.

PUKMEDIA