Erebistana Siûdî ragihandina hevpeymaniyeke deryayî ya navdewletî kir

asharq

Hevpeymaniyeke deryayî ya navdewletî

Erebistana Siûdiyê avakirina hevpeymaniyeke deryayî ya parastinê ya pirneteweyî bi beşdariya 43 welatan û Yekîtiya Ewropayê ragihand ji bo parastina ewlehiya Tengava Babûlmendeb, Kendava Edenê, Deryaya Sor û rêçikên bazirganî, ku bajarê Riyadê dê bibe navenda herheyî û sereke.

Wezareta Berevaniyê ya Siûdiyê ragihand ku bi beşdariya Yekîtiya Ewropayê û nûnerên 43 dewletan, civînek derbarê avakirina hevpeymaniyeke deryayî ya parastinê ya pirneteweyî de pêk anîne û armanca hevpeymaniyê jî, parastina ewlehiya Tengava Babûlmendeb û kendava Edenê û dabînkirina ewlehiyê ye ji bo rêrewên bazirganiya cîhanî û xetên şandina enerjiyê ji Deryaya Sor ve.
Wê da xuyakirin ku ligel welatên damezirîner ên hevpeymaniyê, tekez li ser wê yekê kirine ku ewlehiya deryayî berpirsiyariyeke hevpar e û hevkarî û ahengî di navbera welatan de bingehê sereke ye ji bo rûbirûbûna gefên deryayî yên hevpar û sînorbezên, bi ahengê ku beşdar bibe di xurtkirina ewlehî, aramî û geşepêdana cîhanî de.

Wezareta Berevaniyê ya Erebistana Siûdiyê herwiha tekez kiriye ku beşdarbûna di çalakî û operasyonên hevpeymaniyê de, biryareke serbixwe ya her welatekî ye û li gorî sîstem û rêkarên nîştimanî yên xwe dibe, welatên beşdar jî dê berdewam bin li ser temamkirina rêkarên xwe yên navxweyî ji bo peydakirina pêwendiyeke fermî bi peymannameya hevpeymaniyê ve, herwiha daxwaz ji wan welatan tê kirin ku hevkar in di armancên wê de ku tevlî bibin.
Hevpeymanî dê hevkariyan di warên ewlehiya deryayî, danûstandina zanyarî û îstîxbaratê, pilankirina operasyonan, perwerde û bilindkirina şiyanan de xurtir bike, ew jî ji bo misogerkirina ewlehiya rêçikên deryayî yên navdewletî wekî berpirsiyariyeke giştî.

Herwiha, avakirina vê hevpeymaniya pirneteweyî wekî çarçoveyekê ji bo hevkariya deryayî ya leşkerî tê ji bo xurtkirina ewlehiyê û parastina rêçikên bazirganî, Erebistana Siûdî wekî welatê damezirîner û serokê hevpeymaniyê dê bibe navenda herheyî û sereke, bi vî rengî fermanxaneyên fermandarî, kontrol û jûreya operasyonên deryayî yên hevpar dê li wê welatê bin.
Ev daxuyanî piştî wê yekê hat ku Wezareta Berevaniyê ya Saudi Erebistanê li bajarê Riyadê mêvandariya civîna serokê erkê artêşê û nûnerên 43 welatan û nûneratiya Yekîtiya Ewropayê kir ji bo gotûbêjkirina avakirina vê hevpeymaniya parastinê ya deryayî li hember geşesendina gefên li ser sektora çûnihatina deryayî.

PUKMEDIA