Nêrweyî: Medyaya Partî bi neberpirsiyarane rûmala bombebarankirina Silêmaniyê dike

PUKMEDIA

Berpirsê Borda Ragihandinê ya YNKê Letîf Nêrweyî

Duh çend caran êrîşên bi dronan li ser parêzgeha Silêmaniyê hatin encamdan. Di vê derbarê de, Berpirsê Borda Ragihandinê ya Yekîtiya Nîştimaniya Kurdistanê (YNK) ragihand: Medyayên Partî (PDK) bi naberpirsiyarî rûmalkirina bombebarankirina Silêmaniyê dikin, ku ev yek ji wan êrîşên li ser bajêr tên kirin kêmtir nîne, rûmalkirina rasterast, dayîna zanyariyan û nîşandana cihên bombebarkirî, hewleke berfireh e ji bo belavkirina tirs û xofê da ku welatî wan cihan biterikînin.

Berpirsê Borda Ragihandinê ya Yekîtiya Nîştimaniya Kurdistanê Letîf Nêrweyî, bi taybetî ji PUKMEDIA re axifî û got: "Tiştê ku şeva borî medyayên Partî li hember bajarê Silêmaniyê û sînorê parêzgeha Silêmaniyê kir, ji wan êrîşên ku hatin ser bajêr kêmtir nebûn. Ji ber ku ev yek berevajî rênmayiyên Sendîkaya Rojnamevanan û bendên yasaya taybet a karê rojnamevaniyê yê li Herêma Kurdistan û Iraqê bû, heta berevajî wan biryaran bûn yên ku Wezareta Navxwe ji bo rûmalkirina bûyeran belav kirine."

Her wiha Nêrweyî ragihand: "Rûmalkirina zindî, dayîna zanyariyan û nîşandana cihên bombebarkirî, hewleke berfireh bû ji bo belavkirina tirs û xofê da ku welatî wan cihan biterikînin,  ji ber vê yekê, tiştê ku duh hat dîtin, em dikarin bi vî rengî kurt bikin ku medyayên Partî sînorê parêzgeha Silêmaniyê xistine derveyî bazineya (çembera) ewlehiya neteweyî û nîştimanî û wekî medyayeke dijber peyamên xwe belav dikirin."

Nêrweyî got jî: "Li hemberî vî karê ku medyayên Partî kirin, ew nermiya ku îdareya Silêmaniyê li hember medyayên Partî nîşan da, li tu welatekî pêşkeftî yê cîhanê tune ye û nayê dîtin. Ji ber ku dema metirsiyek ber bi ewlehiya neteweyî û nîştimanî ve tê, bi taybetî ji bo bajarekî mezin, hingê nabe bi pîwerên medyaya azad derfet bê dayîn ku medyayeke diyarkirî metirsiya ewlehiya neteweyî zêdetir bike û hewl bide tirs û xofê belav bike. Her wiha hewl bide hinek cihên ku hatine armancgirtin destnîşan bike û zanyariyan bide wan aliyên ku êrîşê dikin; ev yek li tu cihekî pêşkeftî yê cîhanê nayê qebûlkirin, ji ber vê yekê, em wekî medyaya Yekîtiya Nîştimaniya Kurdistanê (YNK)ê nîgeraniya xwe li hember tiştê ku medyaya Partî (PDK)ê encam daye diyar dikin û di heman demê de daxwaz ji aliyên peywendîdar ên îdareya Silêmaniyê dikin ku rêkaran bi şêwazekî wisa bigrin ber ku ligel yasaya Sendîkaya Rojnamevanan û rênmayiyên Şaxa Silêmaniyê ya Sendîkaya Rojnamevanan biguncê, her wiha ligel wan rênmayiyên ku ji aliyê Wezareta Navxwe ve tên belavkirin hevaheng be. Ji ber ku berdewambûna medyayên Partî li ser wî halê ku şeva borî li Silêmaniyê rû da, metirsiyê zêdetir dike û tirs û xofê zêdetir belav dibe."

Li beramber helwesta medyaya Yekîtiyê YNKê jî , Letîf Nêrweyî amaje bi vê yekê kir: "Em wekî medyaya Yekîtiyê ku bêdeng in û zanyariyan li ser wan cihan belav nakin ên ku li sînorê Partî tên bombebarankirin, em xwe berpirsiyar dibînin. Em medyayeke berpirsiyar in; bi wateya berpirsiyariya exlakî, berpirsiyariya nîştimanî, berpirsiyariya neteweyî û heta berpirsiyariya civakî jî. Ji ber ku em nabin sedema bê îstikrariyê ji bo welatiyan û me bêdengî hilbijartiye, hin caran  wekî nûçe jî bombebaranên Hewlêr û Dihokê belav nakin, ji ber ku bi vê yekê xelk dizane ka kîjan medya medyayeke nîştimanî ye û kîjan medya jî medyayeke naberpirsiyar e."

Duh roja Înê 17.07.2026an, di demên sibeh û şevê de êrîşên firokeyên bêfirokvan (dronan) li ser Silêmaniyê hatin encamdan, medyaya Partî jî bi rûmalkirinên xwe tirs û xof di nav xelkê de belav kir û bi naberpirsiyarî nêzîkî rewşê bû. Ev yek wisa tê xwendin ku medyaya Partî sînorê parêzgeha Silêmaniyê xistiye derveyî çembera ewlehiya neteweyî û nîştimanî.

PUKMEDIA