Ava komkirî ya Îraqê bo 34 milyar metir sêca bilind bûye

PUKMEDIA

Bendava Mûsilê

Wezîrê Çavkaniyên Avê yê Îraqê radigihîne ku ji ber barîna zêde ya baranê, ava embarkirî ya welat ji 5 milyar metre sêcayan derketiye 34 milyar metre sêcayan, û daxwazê ji her kesî dike ku ji bo parastina vê astê hevkar bin.

Musena Temîmî, Wezîrê Çavkaniyên Avê daxuyand: Rewşa avê di dawiya sala 2025an û destpêka sala 2026an de pir giran bû, Îraqê tenê 5 milyar metre sêca ava embarkirî hebû, ku ev jî nizmtirîn asta embarkirina avê ye ku ji sala 1933an ve hatibe tomarkirin. Her weha dibêje: Niha ji ber zêdebûna barîna baranê, ew rêje gihîştiye 34 milyar metre sêcayan.
Wezîrê Çavkaniyên Avê amaje bi wê yekê jî kir: Tevî vê zêdebûnê, ev qebar hîn jî kêmtirî nîvê wê rêjeyê ye ku di sala 2021an de hebû, dema ku ava embarkirî gihîştibû 60 milyar metre sêcayan.
Li ser giringiya hevkariya her kesî ji bo parastina vê yedeka avê bi armanca piştgirîkirina sektora çandiniyê tekez kir.

Li ser guherîna keşûhewayê û bandora wê ya li ser Îraqê, Musena Temîmî, Wezîrê Çavkaniyên Avê, weha anî ziman: Îraq yek ji wan welatan e ku herî zêde ji ber guherîna keşûhewayê zirar ditiye, ji bilî ku li ser asta navxweyî, berê giringiyeke wiha nedibû sektora avê û siyasetên avê.
Di dawiya daxuyaniya xwe de, Temîmî bal kişand ser kevinbûna projeyên avê yên Îraqê li beramberî geşedanên teknolojîk ên li welatên cîran û ragihand: Welatên çavkaniyên avê (welatên cîran) daxwazê ji Îraqê dikin ku siyaseteke nû ya avê bigire ber xwe ku hevaheng be ligel wan rûbirûbûnên ku ji ber guherîna keşûhewayê derketine holê.

PUKMEDIA