Mekteba Ragihandin:Astengkirina rojnamegeriyê binpêkirineke yasayî û exlaqî ye

PUKMEDIA

Burda Ragihandina YNKê

Navenda Badînan ya Mekteba agihandin û Hişyariyê ya Yekîtiya Nîştimanî ya Kurdistanê (YNK) peyamek weşand û got: Em astengkirina rojnamevanan li Duhokê wekî binpêkirineke yasayî û exlaqî dibînin û divê mafê rojnamegeriyê û gihîştina agahiyan ji bo hemû rojnamevan û dezgehên fermî û destûrdar were gerantîkirin.

Naveroka Peyamê…

Astengkirina karmend, tîm û nûçegihanên Kanala Gelî Kurdistan ji aliyê xalên kontrolê û hêzên ewlehiyê ve li parêzgeha Duhokê, bûye diyardeyek berdewam û çend caran dubare dibe, nemaze li navçeya Amêdiyê.

Ev reftarên hêzên ewlehiyê binpêkirineke eşkere ya Yasaya Hejmar 35 ya li ser Rojnamegeriyê ye ku di sala 2007an de ji aliyê Parlemana Kurdistanê ve hatiye derxistin, her wiha binpêkirina Yasaya Hejmar 11 li ser Mafê Bidestxistina Zanyariyan ye ku ji hêla Parlemanê ve di sala  2013 an de hatiye pejirandin.

Kanala Gelî Kurdistan dezgehek medyayî ya destûrdar û pejirandî ye nûçegîhan û tîmên wê mafê wan heye ku li her bajar û herêmeke Herêma Kurdistanê werin parastin û bê astengî karê xwe bikin, lê mixabin, Tîmên Gelî Kurdistan li bajar û herêmên cuda, bi taybetî li navçeya Amêdiyê, ji aliyê xalên kontrolê û hêzên ewlehiyê ve gelek caran rastî astengiyan hatine.

Di vê çarçoveyê de, roja Sêşemê (28-04-2026)an, dema ku Nûçegihanê Gelî Kurdistan li navçeya Amêdiyê hewl da ku biçe yek ji taxên bajêr da ku hin gilî û daxwazên welatiyan veguhezîne, xaleke kontrolê ya hêzên ewlehiyê rê li ber rojnamevan (Îsam Amêdî) û karmendên wî girt û rê neda wan ku erkên xwe yên rojnamevaniyê pêk bînin.

Em wekî Navenda Badînan ya Mekteba Ragihandin û Hişyariyê ya Yekîtiya Nîştimanî ya Kurdistanê (YNK) tedbîr û reftarên weha wekî binpêkirinek yasayî û exlaqî dibînin, di heman demê de, em daxwaz ji Sendîkaya Rojnamevanên Kurdistanê, dadgeh û saziyên dadwerî dikin, dezgehên ewlehiyê, berpirsên yekîneyên îdarî û aliyên peywendîdar pabend bikin ji bo cîbicîkirina yasaya rojnamegeriyê.

Her weha divê mafê rojnamegeriyê û gihîştina zanyariyan ji bo hemû rojnamevan û dezgehên fermî û destûrdar jî were peyda kiri û êdî astengî li pêşiya karmendên Kanala Gelî Kurdistan û her dezgeheke din ya ragihandin neyê kirin.

Navenda Badînan ya Mekteba agihandin û Hişyariyê ya Yekîtiya Nîştimanî ya Kurdistanê (YNK)

PUKMEDIA